Hemşaredarê Şaredarîya Amedî ya Şaristanê Girdî Dogan Hatun, Kombîyayîşê Rêncberan de Rêncberanê keyeyîyan reyde ame têhet, problemê ke wareyê ziraetî de est ê û pêşnîyazê çareyî goşdarî kerdî. Hemşaredar Hatunî qeyd kerd ke bi kooperatîfîye şêna problemê Rêncberan safî bibo.

Şaredarîya Amedî ya Şaristanê Girdî, Komela Ekolojî reyde seba Rêncberê keyeyîyan ke wareyê ziraetî de mintiqaya ma de xebitênê, Kombîyayîşê Rêncberan organîze kerd. Kombîyayîşê Rêncberan ke Merkezê Kultur û Kongre yê Çand Amedî de virazîya, tede Hemşaredarê Şaredarîya Şaristanê Girdî Dogan Hatun, Hemşaredarê Şaredarîya Pasûrî Murat Îpek, Sereka Daîreya Îklîm û Eşteyê Sifirî Evîn Dînar, temsîlkarê Komela Hewzeya Awe û komelanê ekolojî yê bajarî beşdar bîyî.

Hemşaredar Hatunî va ke Mezopotamya de 12 hezar serrî yo cuye est a la komel vera-vera tabîet ra dûrî keweno. Hemşaredar Hatunî îfade kerd ke "Na herr a ke genim/xele reya verêne tede kewt erd û însanan genim nas kerd" û va heta ewro Çemê Dîcle de çi rey awe nêbiryaya û na herême de 12 hezar serrî cuye dewam kerda. Hatunî va "Verê cû însanan herra xo ramitêne û hewcedarîyê xo temîn kerdêne, kesî rê muhtac nêbîyêne. Nika nê erdan de zaf bereket est o la ma nêeşkenê awe û herra xo ra tam îstîfade bikerê."

Hemşaredar Hatunî bale ant problemanê ziraetî ser o û va "Ma şênê bi kooperatîfîye problemanê xo safî bikerê. Verê cû sistemêko weş bî. Nika zî ma şênê nê problemî reyra yew sistemêko weş awan bikerê û têreyra nê meseleyan safî bikerê."

Kombîyayîşî de dima Rêncberan qisey kerd û problemê xo yê sey weşîya heywanan, darûyê ziraetî, krîzê îklîmî û kêmîya awe îfade kerdî. Hemşaredar Hatunî problemê ke ameyî vatene not girewtî û qeyd kerd ke pîya munaqeşekerdiş şêno ê probleman safî biko