Şaredarîya Amedî ya Şaristanê Girdî, seba 287 personelan ke mîyanê xebata dermankerdişî ya vera popûlasyonê heşerayan de xebetîyenê, programê perwerdeyî organîze kerd.

Ekîbê dermankerdişî yê Serekîya Daîreya Karê Weşîye; seba ke popûlasyonê melşe û kêzikanê bînan weşîya însanan rê tehluke nêbo, tedbîran gênê.

Mudirîya Şefîya Baytarî ya Serekîya Daîreya Karê Weşîye, 17 qezayan de pêroyê serre de û bêvindertene vera melşe, kêzik û kijnik û yê bînan ke eşkenê tehluke bidê weşîya însan û heywanan, xebatan kena.

Xebatê amadekarîye rew dest pêkerdî

Serekîya Daîreya Karê Weşîye seba aşmanê hamnanî xebatanê amadekarîye rew dest pêkerd û seba ke zanayîş û qabîlîyetê personelan ke vera popûlasyonê heşerayan de xebetîyenê, zêde bikero, programê perwerdeyî organîze kerd.

Personelan rê perwerdeyê teorîk û pratîkî ame dayene

Programê perwerdeyî de ke Beşê Dermankerdişî de ame organîzekerdene, hetê perwerdekaranê pisporan ra 287 personelan rê perwerde ame dayene.

Perwerdeyî de ke çarçewaya amadekarîya aşmanê hamnanî de ame organîzekerdene, seba ke sewîyeya zanayîşê ekîban berz bibo, derheqê şuxulnayîş û pakkerdişê cîhazan de melumatê detayinî ameyî dayene.

Bi perwerdeyê teorîkî reyde, seba ke cîhazê dermankerdişî yê sey ULV, holder, atomîzer û pompaya pişte hîna bibereket û bi zanayîş bêrê şuxulnayene, perwerdeyê pratîkî zî ame dayene.

Pawitişê weşîya şarî amanc o

Bi saya perwerdeyî, pawitişê weşîya şarî, zêdekerdişê tasarufê dermanan, ronayîşê cîhazan bi hawayêko raşt û aktîf amanc beno.

'Perwerdeyî do piştî bidê xebatan’

Serekê Daîreya Karê Weşîye Vahap Saçakliyî programê perwerdeyî de qisey kerd û va ke perwerdeyî do piştî bidê xebatanê vera heşeratan.

Saçakliyî îfade kerd ke bi saya xebatanê ke benê, aşmanê hamnanî de popûlasyonê kêzik û melşeyan zaf kêmî bibo û şar do goreyê serranê verênan hîna rehet demêkê hamnanî bivîyarno.