Mudirîya Pêroyî ya DÎSKÎ ya Şaredarîya Amedî ya Şaristanê Girdî, bi projeyanê modernîzekerdişê binawanî, 1.143 xirabîyê ke bîranê sondajî yê taxanê teberî û merkezî de bîyî, safî kerdî.

Çarçewa projeya "Karê Xizmetê Tamîr û Pakkerdişê Motopompî" ke Daîreya Averşîyayîşê Stratejîyî yê Mudirîya Pêroyî ya Daîreya Awe û Kanalîzasyonî (DÎSKÎ) de ameyo destpêkerdene, seba modernîzekerdişê binawanîya awe ya şaristanî û seba ke problemê ke est ê tewr tay bikero, dest bi xebatan kerd. Hedefê proje o yo ke temînê awe yê şaristanî hîna berhemin bikero.

Proje 12 aşman de do biqedîyo

Projeya ke 20ê êlule 2024î de destpêkerd, ame plankerdene ke 12 aşman de biqedîyo. Çarçewaya proje de 75 qelemê cîya-cîyayê pakkerdişî û yê tamîrî est ê, modernîzasyonê şebekeyê awe reyde, do îfrafê awe bêrê kêmîkerdene û çimeyê awe do bi hawayêko tesîrin bêrê şuxulnayene.

1.143 xirabîyî ameyî safîkerdene

Ekîbê Şefîya Bîranê Awe û Pompayan ya Serekîya Daîreya Elektrîk û Makîne ya DÎSKÎ, 5 aşmanê verênan ê serre de, 541 xirabîyê mekanîkî û 602 xirabîyê elektrîkî ke bîrê sondajî ke taxanê merkez û dewan de bîyê, tamîr kerdî û tamîrê pompayanê veşayeyan kerd.

'5 aşman de ma serkewte bîyî'

Mudirê Şefîya Bîranê Awe û Pompayan Mustafa Ateşî ke derheqê xebatan de melumatî dayî, qeyd kerd ke ê bi projeyan tena nêwazenê berhemanê şebekeyê awe zêde bikerê, ê wazenê ke şaristanîyanê ke dewan de ciwîyenê, înan rê zî resayîşê awe yo pake û bêvindertiş asan bikerê.