Şaredarîya Amedî ya Şaristanê Girdî, badê xebata ronayîşê 4 hezar sitilanê çopî yê arteranê serekeyan de nika dest pêkerd ke kîşta rayîran de seba ke hafrîyat nêrê rokerdene lewhayê îqazî rono.

Serekîya Daîreya Kontrol û Pawitişê Derûdorî bi sloganê a "Ez Amed ra hes kena, lêmin nêkena" xebatanê xo dewam kena ke 5ê Hezîrane Roja Cugehî ya Dinya de kampanyaya pakîye daybî destpêkerdene. Çarçewaya xebatan de ekîbî ke 29ê teşrîna verêne de dest bi ronayîşê 4 hezar sitilanê çopî kerdbî, resayî peynîya xebate û nika kîşta rayîran de lewhayê îqazî ronanê ke seba ke hafrîyat, moloz û eşteyî nêrê rokerdene ke weşîya însan û derûdorî talûke yê.

Mudirê Şubeyê Eşteyê Girewteyî yê Serekîya Daîreya Kontrol û Pawitişê Derûdorî Mehmet Baranî na xebate ser o malumatî dayî û va ke çarçewaya kampanyaya "Ez Amed ra hes kena, lêmin nêkena" de, kampanyaya pakîye ke şaristanî de yena ramitene, bîya seferberîya pakîye.

'Do prosesê îdarî bêrê tetbîqkerdene'

Baranî ke va şarî ra reaksîyonanê positîfan gênê, derheqê eştişê bêdestûr û qaçaxî yê hafrîyatî de nê çîyî vatî: "Cayê ke hafrîyat tede bi hawayêko qaçax yeno rokordene, ma tespît kerdî. Ekîbê ma do înan pak bikê. Şaredarîya ma na babete de do kontrolanê xo bikero. Kam ke ame tespîtkerdene ke harfîyatê xo cayê tayînkerdeyî de nêrokeno, înan rê prosesê îdarî tetbîq benê. 

'Ma zerar nêdê sitilanê çopî'

Baranî îfade kerd ke ê resenê peynîya ronayîşê 4 hezar sitilanê çopî ke hedefe înan bî û şarî ra waşt ke sitilanê çopî rê wayîrîye bêro kerdene û zerar nêdîyo înan.