Şaredarîya Amedî ya Şaristanê Girdî, seba pawitişê weşîya şarî destpêkerdişê Aşma Remazanî ra heta ewro 712 cayê karî kontrol kerdî.

Ekîbê ke girêdayeya Serekîya Daîreya Xizmetê Weşîye yê, Aşma Remazanî de cayê karî ke weşîya şarî rasterast eleqedar kenê, sey lokanta, pastane û îmalatxaneyan de kontrolê xidayan kenê.

Ekîbî ke badê perwerdeyî ke Koordînasyonê Kontrolê Xidayan de ame dayene, xebatê xo ramitî, Aşma Remazanî de merkezê şaristanî de û 17 qezayan de kontrolanê xo dewam kenê.

Ekîban, çarçewaya kontrolan de ke 712 cayê karî de kerdî, 80 kîlo çaya qaçaxe ke tarîxê ci vîyarto, 452 lître şit, 68 kîlo ardî, 15 kîlo goşto sur, 25 kîlo goştê kerge, 27 kîlo mamûlo bêetîket û 4 kartonê hakan dest ame serronayene. Ekîban kontrolê firinan de tesîsî ke nanî kêmîgram virazenê, tespît kerdî. Ekîban xidayî îmha kerdî û seba cayê karî prosesê qanûnî tetbîq kerd.

'Ma destûr nêdanê ke weşîya şarî dekewîyo rîsk'

Kontrolî de Serekê Daîreya Weşîye Vahap Saçakliyî malumatî dayî û va ke derheqê pawitişê weşîya şarî û tedarikkerdişê xidayan de tawîz nêdanê û wina dewam kerd: "Kontrolê ma bêvindertiş do dewam bikê, ma qetî destûr nêdanê ke weşîya şarê ma bikewo rîsk."

Ekîbî do Aşma Remazanî de zî kontrolê xidayan bi hawayêko xurt dewam bikê û seba weşîya şarî tedbîranê xo bigîrê.