Şaredarîya Amedî ya Şaristanê Girdî, badê 8 serran Vazdayîşê Şarî yê Newroze bi beşdarîyêka girde û bicoş organîze kerd.

Peynîya musabeqa de ke xelatî ameyî dayene û Hemşaredar Dogan Hatunî hêvî kerd ke Newroze bibo wesîleyê aştî.

Serekîya Daîreya Xizmetê Ciwan û Sporî, seba ke spor Amed de reyna bêro gandarkerdiş, qezaya Sûrî de Vazdayîşê Şarî yê Newroze organîze kerd. Vazdayîşê Şarî yê Newroze ke badê 8 serran reyna ame organîzekerdiş, Birca Keçan ê Berê Mêrdînî de dest pêkerd û Cayê Cuya Hempare yê Sumerparki de qedîya.

Hemşaredara Şaredarîya Şaristanê Girdî Dogan Hatun, Hemşaredara Şaredarîya Kayapinarî Berîvan Gulşen Sincar, Hemşaredarê Şaredarîya Farqînî Kadrî Esen, Sekreterê Pêroyî yê Şaredarîya Şaristanê Girdî Emrullah Gorduk, hetkarê sekreterê pêroyî, serekê daîreyan, xebatkarê şaredarîye û şarê heme grûbanê emran ra 7 ra heta 70î ke bi seyan şar beşdarê Vazdayîşê Şarî yê Newroze bîyî. Astengdarî zî bi afîşanê xo beşdarê vazdayîşî bîyî û piştî daye sporî.

Verê ke vazdayîş dest pêbiko, beşdarî cayê destpêkî de govende girewte. Hemşaredar Hatun zî şarî reyde beşdarê govende bîye. Musabeqa de Hemşaredar Hatun bi formaya numre 21 vazda. Hemşaredar Hatunî startê vazdayîşî da û bi seyan kesan reyde heta Parka Sumerî ya Cayê Cuya Hempare vazda. Şaro ke rayîr ra vîyartêne Hemşaredar û embazanê ey rê serkewtiş waşt û bi çepikan piştî daye.

Badê musabeqe ke Cayê Cuya Hempare yê Sumerparki de qedîya, Hemşaredar Dogan Hatunî qisey kerd. Hemşaredar Hatunî, bi vîrardişê kesanê ke serrgêra qirkerdişê Helebçe de cuya xo vind kerda, dest pêkerd. Hemşaredar Hatunî va ke înan rayîrşîyayîşî şaredarîyanê qezayan reyde organize kerdo û wina dewam kerd: "Ma va wa domananê ma rê seba Newroze planêk bibo. Raşta zî Newroza emserî yew Newroza tarîxî ya. Şarê Kurdî û heme şaranê ke binê tehdayî de manenê, seba înan aştîyêka payîdare ha paweyê ma ya. Ma zî sey rayberê herême seba awankerdişê aştî destê xo kenê binê kemere. Heme xebatê ma, keda ma, seba aştî û seypêyî yo. Domanî, ameyoxê şima seba azadî û aştî yo. Na Newroze wina yew Newroz a."

'Wexto ke aştî bêro welatê ma, do heme Rojhelatê Mîyanênî rê zî bêro'

Hemşaredar Hatunî derheqê deklarasyonê ke 27ê Sibate de seba meseleyê Kurdî ame îlankerdiş zî qisey kerd û va: "Heme hêzî nî deklarasyonî rê wayîr vejîyayî. Coka na Newroze Newroza aştî ya. Wexto ke aştî û aramî bêro welatê ma, do heme Rojhelatê Mîyanênî rê zî bêro. Coka na Newroze muhîm a. Ma domanan reyde venga heme şarê xo danê, 21ê Adare de beşdarê coşê Newroze bibê."

Xelatî dayîyayî wayîranê xo

Badê qiseykerdişê Hemşaredar Hatunî, kesê ke Vazdayîşê Şarî yê Newroze de derece girewtî, xelatê înan ameyî dayene. Kesê yewinî rê takimê eşofmanî yê Amedsporî, solê sporî û formaya maçî ya bi îmzaya futbolîstanê Amedsporî; kesê dîyinî rê takimê eşofmanî yê Amedsporî û formaya maçî ya bi îmzaya futbolîstan; û kesê hîreyinî rê zî formaya maçî ya bi îmzaya futbolîstanê Amedsporî ame dîyarîkerdene.