Mudirîya Pêroyî ya DÎSKÎ, planê çalakîyanê rîskanê awa şimitişî qezaya Gêlî de dest pêkerd. Hemşaredara Şaredarîya Amedî ya Şaristanê Girdî Serra Bucakî veng da ke heme fealîyetê bitalûkeyî yê dormeyê Gola Bendawê Dîcleyî ke yew mîlyon û nême kesan rê awe dana, bêrê vindarnayene.

Mudirîya Pêroyî ya DÎSKÎ, seba ke bale bianciyo rîskanê Hewza Awe ya Dîcleyî ke hewcedarîya awe ya şaristanî tedarîk kena û tedbîranê lezabezan ke ganî bêrê girewtene, Meydanê Cumhurîyetî yê Gêlî de beyanatê çapemenîye da. Beyanatî de, Hemşaredaranê Şaredarîya Amedî ya Şaristanê Girdî Serra Bucak û Dogan Hatunî ra teber hemşaredarê qezayan, Odaya Tabîban, Komela Heqê Merdiman (ÎHD), Komîsyonê Cugehî yê Baroya Amedî, endamê îdareyî yê Odaya Tîcaret û Sanayî ya Amedî (DTSO), Meclîsê Cinîyan yê DTSO, Komîsyonê Ekolojî yê Komela Huqûqnasan seba Azadîye (ÖHD), Komela Ekolojî, Grûba Bisîkletê Cinîyan, rayberê şaristanî û yê qezaya Gêlî yê DEM Partî, muxtarê Gêlî û şarê ke qeza de ciwîyeno beşdar bîyî. Beyaenatî de pankartê bi nuşteyê "Ma Hewza Awa Şimitişî bipawê, ma bi hêvî ameyoxî ra biewnîyê" û afîşê ke rîskanê krizê awe nîşan danê, ameyî tepiştiş.

Hemşaredare Bucak: Ma dest bi planê çalakîyan kenê

Hemşaredare Bucak ke beyanatî de qisey kerd, îfade kerd ke demêko derg o ke sey DBB’yî hem DÎSKÎ hem zî dezgehê ke nê warî de xebitîyenê, înan reyde ê planê çalakîyan hazir kenê. Hemşaredare Bucak va: "Nê beyanatê çapemenîye reyde ma wazenê soz bidê ke ma do bi dinamîkanê şaristanî û şarî reyde planê çalakîyan virazê û tetbîq bikerê. Ma îlan kenê ke na xebate dest pêkerd."

'Ganî fealîyetê dormeyê hewze bêrê vindarnayene'

Bucak îfade kerd ke Gêl qezayêka muhîm a, hem mezelê pêxemberan uca de yê, hem zî yew mîlyon û nême kesan rê awe dana: "Ma yew bajar de ciwîyenê ke çeşmeyanê xo akenê û awa şimitişî tira yena. Na rewşe Tirkîya de hende nîna dîyayene. Coka hewza ma ya awe zaf erjayaye ya. Ganî ma bi zanayîşê naye rayîra xo dîyar bikê. Eke ma planê çalakîyan nêvirazê ma nêeşkenê awa şimitişî pak bikê. Awa ma lêmin bena, Gola Bendawê Dîcleyî lêmin bena, tîya de rolêko muhîm keweno ma ser. Mudirîya Şaristanî ya Daristanî, DSÎ, qaymeqamî, walîtî, muxtarê dewan, na meseleyêka zaf muhîm a ke ma eleqedar kena. Hewza awe, Dîcle, Gêl, Henî û Erxenî ra yena meydan. Tîya ra ma venga şaredaranê ma û qeymeqaman danê; na hewze de pêncas ra vêşêr dewî est ê, ganî fealîyetê dormeyê na hewze bêrê vindarnayene. Ganî ma na berpirsîyarîye bîyarê bi ca."

'Gêl de fealîyetê turîstîkî nêbenê'

Hemşaredare Bucak va ke seba krizê îklîmî varan nêvareno û wina dewam kerd: "Gola ma ya bendawî, hewza ma ya awe bêpeynî nîya, nê beyanatê çapemenîye reyde ma wazenê soz bidê ke ma do dinamîkanê şaristanî û şarî reyde planê çalakîyan virazê û tetbîq bikerê. Gêl qezayêka turîstîkî nîya, cayê pawitişê derecaya yewine de ya, coka uca fealîyetê turîstîkî nêbenê, kargehî nêbenê. Ma do Mudirîya ma ya Pêroyî ya DÎSKÎ reyde game bi game planê pawitişê hewze tetbîq bikê. Eke ma fealîyetê xo yê cuye û bazirganîye nêvidnarnê, ma do vera rastîya lêminbîyayîşê awe de bimanê."