Şaredarîya Amedî ya Şaristanê Girdî, verê Roşanê Remezanî seba ke şarê ma îbadetxaneyan de şertanê pakî de îbadetê xo bikerê, xebata pakkerdişî daye destpêkerdene.

Serekîya Daîreya Kontrol û Pawitişê Derûdorî bi sloganê "Ez Amed ra Hes Kena, Lêmin Nêkena" çarçewaya kampanyaya pakkerdişî de ke 5ê Hezîranî Roja Derûdorî ya Dinya de destpêkerdbî, verê Roşanê Remezanî îbadetxaneyan de xebata pakkerdişî kena.

68 îbadetxaneyan de xebate bena

Ekîbê 10 kesî ke girêdayeyê Serekîya Daîreya Kontrolî û Pawitişê Derûdorî yo, heme şaristanî de 68 camî, kilîse û cemxaneyan de xebatanê şutiş û dezenfekteyî keno. Ekîb do xebatanê xo saetanê şewe de ke qelebalix çin o, bikero.

Ekîbê pakkerdişî xebata xo saete 12.00 de şewe, Camîyê Qurşunlî ke mîyanê Sûrî de yo, dest pêkerd.

Şar do cayêkê hijyenîkî de îbadetê xo bikero'

Serekîya Daîreya Kontrol û Pawitişê Derûdorî Şefîya Şûbeyê Eşteyanê Huşkan Mehmet Baranî, derheqê xebatan de melumat da û va ke seba ke şar cayêko hîna hijyenîk de îbadetê xo bikero, seba Roşanê Remezanî sey Şaredarîya Şaristanê Girdî xebata pakkerdişî û şutiş daya destpêkerdene.

Verê xebata pakkerdişî fîzîbîlîte ameyo kerdene

Baranî qeyd kerd ke verê ekîbanê şaredarîye seba pakkerdişê zaf îbadetxaneyan ke şaristanî de est ê, xebata fîzîbîlîteyî kerda, bi xebata fîzîbîlîteyî ê cayê îbadetan ke hewceyîya înan bi pakkerdişî est o, ê tesbît bîyê û goreyê naye programê xo viraşto.

'Verê cayanê tarîxîyan de'

Baranî dîyar kerd ke cayanê tarîxî û turîstîkan de, yanî Qezaya Sûrî de xebate dest pêkerd û wina va: "Seba Roşanê Remezanî, ma do bi taybetî cadeyê Xazî, Melîkahmed û Turîstîkî, ke mîyanê Sûrî de muhîm ê, ma do înan de hem pak bikê hem zî bişuwê."

Baranî îfade kerd ke ê xebatan 10 kesan reyde ramenê; "Seba ke ma heme camî, tuwalet û çeşmeyî pêro bihijyen bibê, ma bi malzemeyanê dezenfektanî înan şimenê."

'Pakîya şaristanî bi destanê pîya bena'

Baranî va ke kampanyaya "Ez Amed ra Hes Kena, Lêmin Nêkena" dewam kena, waşt ke şar wayîrîye bikero û qutî û konteynîranê çopî rê zerar nêdê, do hîna hîsdar bibê. Baranî va ke çarçewaya şaredarîya şarî de pakîya şaristanî bi destanê pîya bena.