Şaredarîya Amedî ya Şaristanê Girdî, seba ke beşdarîya aktîfe ya astengdaran cuya komelkî de temîn biko û çareyanê domkerdoxan bivirazo, kombîyayîşêk komelanê astengdaran û temsîlkarê rêxistinanê civakî reyde organîze kerd.
Serekîya Daîreya Xizmetê Astengdar û Pîran seba ke şaro astengdar bi hawayêko seypê û aktîf beşdarê cuya komelkî bibo, polîtîkayê heqdarî bîyaro ca û nê warî de çareyanê domkerdoxan bivirazo, Merkezê Kultur û Kongre yê Çand Amedî de kombîyayîş kerd. Kombîyayîşo ke 30 komelî û zaf temsîlkarê rêxistinê sivîlan ke merkez û qezayanê şaristanî de warê astengdarîye de xebate kenê dawet bi, temsîlkarê şarê astengdarî, waştiş û pêşnîyazê çarekerdişî înan ardî rojeve.
Kombîyayîşo ke bi serekîya Serekê Daîreya Xizmetê Astengdar û Pîran Îsmaîl Degîrmencî virazîya, tede waştiş û pêşnîyazê çarekerdişî yê şarê astengdarî ameyî goşdarîkerdene û yew bi yew not bîyî.
Hewteyê Astengdaran
Kombîyayîşo ke hetê Şefîya Şûbeyê Astengdaran ra organîze bî, tede seba ke fealîyetê programanê Hewteyê Astengdaran ê 10-16ê Gulanî de bêrê organîzekerdene, goreyê fikranê komelanê astengdaran ameyî şekilkerdene û fealîyetê ke do mîyanê serre de dewam bikerê zî ameyî qiseykerdene.
Kombîyayîşê plankerdişî yê aşma gulane keame waştene ke tecrube û pêşnîyazê rêxistinanê astengdaran daxilê prosesê qerardayîşê şaredarîye bibo, hîna mabênê rayberîya herêmkî û rêxistinanê komelkî de mekanîzmayêko daîmî yê hemkarîye bêro viraştene.
'Ma xebatanê xo heqdaran ramnenê'
Şefê Şûbeyê Astengdaran Emîn Baranî ke derheqê kombîyayîşî de malumat da, dîyar kerd ke sey Serekîya Daîreya Astengdar û Pîran a Şaredarîya Şaristanê Girdî, ê cehd kenê ke xebatanê xo 30 komelanê astengdaran reyde biramê, û va ke ê xizmetê ke seba astengdaran ramnenê, heqdar, seypê û resayox ê.
'Ma mîyanê aşma gulane de xebatî plan kerdî'
Baranî ke îzah kerd ke ê rêxistinanê astengdaran zî daxilê prosesanê qerardayîşê xebatan kenê, wina va: "Na çarçewa de ma ewro tîya de kombîyayîşêk kerd û ma 30 komelanê xo dawet kerdî. Teqrîben pêro ameyî kombîyayîş. Kombîyayîşêko weş û pêşnîyazan reyde vîyart. 10-16ê Gulane Hewteyê Astengdaran de ma seba aşma gulane de xebatî plan kerdî. Nê warî de tayê fealîyetî vejîyayî vernî."
'Ma sey şaredarîye berpirsîyarîye girewte'
Baranî va ke îna qerar dayo ke nê kombîyayîşî perîyodîk heme serre rê vila bikerê û qalê xo wina qedênayî: "Ma sey şaredarîye berpirsîyarîye girewta ke heqê astengdaran bi perspektîfêko heqdar bêrê ramitene û ma do xebatanê xo rêxistinanê astengdaran reyde pîya biramê."
