Şaredarîya Amedî ya Şaristanê Girdî, seba Xerîtaya Astengdaran ke do seba ke xizmetê kesanê astengdaran bêrê ravêrberdene bîyaro meydan, 17 şaredarîyanê qezeyan reyde pîya bi hemkarîye xebatanê saha da destpêkerdene.

Serekîya Daîreya Xizmetê Astengdar û Pîran şarê astengdaran rê xizmetanê xo dewam kena û seba Projeyê Xerîtaya Astengdaran dest bi xebate kerd. Şaredarîya Şaristanê Girdî, seba ke şarê astengdaran rê xizmetêko hîna baş bido, 17 şaredarîyanê qezeyan reyde pîya bi hemkarîye do Xerîtaya Astengdaran bîyaro meydan.

Seba Xerîtaya Astengdaran ke do bêro hazirkerdene, ekîbî ke amey ronayene, do keye bi keye bigêrê û tespîtê astengdaran bikerê. Seba ke şertê ciwîyayîşê şarê astengdaran bêrê başkerdene, heme melumatê derheqê astengdaran de do formî bêrê pirkerdene û pêrune binê banê koordînatorîya xebata sahayî de do bêrê arêdayene.

'Dîyarkerdişê polîtîkayanê xizmetî rê do faktorêko muhîm bo'

Koordînatorê Xebata Saha yo Pêroyî yê Serekîya Daîreya Xizmetê Astengdar û Pîran Mustafa Yaşarî derheqê xebate de melumat da û îfade kerd ke xebata ke ê kenê, çarçewaya Planê Stratejîkî yê Averşîyayîşî yo 2025-2029 yê Şaredarîya Amedî ya Şaristanê Girdî de yena kerdene. Yaşarî îfade kerd ke ê xebatanê xo şaredarîyanê qezeyan reyde bi koordînasyon kenê û wina dewam kerd: “Xebate ke ma destpêkerd, ma heme qezeyan reyde eynî wext dest pêbikero. Datayê ke ma bi naye destpêkenê, do şaredarîya ma de bêro qeydkerdene û prosesanê ameyoxan de do şaredarîyanê qezeyanê ma reyde bêro parekerdene.”