Şaredarîya Amedî ya Şaristanê Girdî xîzmetê miqateyî keye de kal û pîranê  hewcedaran rê dana. Keyeyê înan pak kena.

Şaredarîya Amedî ya Şaristanê Girdî kal û pîranê ma yê ke keye de hewcedarîya înan bi hetkarî est a, înan rê xizmetê pakî û miqateyî dana. Ekîbê Serekîya Xizmetê Sosyalî şinê keyeyê înan û cor ra cêr pakîya înan kenê.

Wezîfedarî, kontrolîya înan a weşîye zî kenê û eke hewce biko, zîxmetê fîzîk tedawî û rehabîlîtasyonî zî danê.

Aşmêke de 200 kesan rê xîzmet

Berpirsîyarê Mudurîya Miqateyê Extîyaran yê Xîzmetê Sosyal û Astengdaran Alî Riza Kayayî dîyar kerd ke 2013î ra yo ke na xebate yena kerdene û serrêk o ke zî xîzmetê fîzîk tedawî û rehabîlîtasyonî zî yeno dayene. Kayayî wina va; "Nika sîstemê ma de 200 kes qeydkerdî yê. Ma aşmêke de reyêk keyeyê înan pak kenê demanê ameyoxî de ma do ekîbanê xo hîra bikerê û xo biresnê hîna zaf kesan. Sîstemê fîzîk tedawî û rehabîlîtasyonî de zî 16 kesî qeydkerdî yê.

 ‘Ez xîzmetî ra memnûn a’

Sultan Sulara ke keye de xîzmetê şaredarî ra îstîfade kena, aye dîyar kerd ke xîzmetî ra memnûn a û wina va; "Ez tena manena, xîzmetê fîzîk tedawî zî gêna. Ekîbê şaredarî yenê keyeyê mi zî pak kenê. Ez veng bida zî yenê, nêda zî yenê."

‘Ma reyde eleqedar ê’

Zulkuf Îskîyo (74) ke xîzmetê şaredarî gêno wina va; "3 serran ra zafêr o ke ez nê xizmetî gêna. Şaredarî ma muxtacê kesî nêkena. Ma reyde eleqedar ê. Ma benê çarnenê û tedawî kenê."