Hemşaredara Şaredarîya Amedî ya Şaristanê Girdî Serra Bucak, xebatê binawanî û asfaltkerdişî yê Baglarî cayê xo de etud kerdî; badê etudanê warî esnaf û hemwelatîyan reyde ameye têhet û waştiş û pêşnîyazê înan goşdarî kerdî. Hemwelatîyanê Cadeyê Gurselî îfade kerd ke bi destpêkerdişê xebata newekerdişî ya ke bi serran ameyêne pawitiş, keyfweş ê.

Şaredarîya Amedî ya Şaristanê Girdî, xebatanê viraştiş, miqate û asfaltkerdişê rayîran ke bi amancê zêdekerdişê rehetîya resî û newekerdişê torra binawanî seranserê şaristanî de daybî destpêkerdiş, bê lezkêmkerdiş dewam kena. Hemşaredare Serra Bucak, na çarçewa de xebatê rokerdişê asfaltî û serûberkerdişê rayîrî yê Cadeyê Gurselî, ke qezaya Baglarî de trafîkê wesayît û peyayan hetê ra yew ra yew nuqteyanê tewr girsan o, cayê xo de etud kerdî.

Hemşaredare Bucak ekîbanê teknîkan ra derheqê rewşa nikayîne ya cade, hedeyê asfaltê rokerde û teqwîmê temambîyayîşî yo amanckerde de agahîya bidetaye girewte û rayîrî ser o etud kerdî. Bucak kontrolanê warî de detayê teknîkî yê projeyî erjnayî û bale ante ser o ke resê şaristanî yo biemnîyet, estetîk û bi standardanê modernan, amancanê şaredarîye yê verênan mîyan de yo.

Waştişê esnaf û hemwelatîyan ameyî goşdarîkerdiş

Hemşaredare Bucak, badê etudanê teknîkan ê Cadeyê Gurselî, dikananê rayîrî ser o yew bi yew zîyaret kerdî û esnaf û hemwelatîyan reyde ameye têhet. Bucake seba fehm û sebrê hemwelatîyan ê vera vengîye û kêmanîyanê trafîkî yê demkîyan sipas kerd û waştiş û pêşnîyazê înan zî not kerdî.

Esnaf û hemwelatîyan dîyar kerd ke seba ke cade bi demêko derg hermîyaye bî, bi taybetî res û ticaretê rojaneyî de zehmetîya girde anta; û îfade kerd ke bi destpêkerdişê xebata newekerdişî ya ke bi serran ameyêne pawitiş, keyfweş ê. Hemwelatîyan bale ante ser o ke bi asayîşêko modern ê rayîrî, hereketê ticarî yê herême do bibo gandar û rehetîya resî do bêra zêdekerdiş.

Zîyaretan de Hemşaredarê Şaredarîya Baglarî Sirac Çelîk, Hetkarê Sekreterê Pêroyî yê DBByî Azîz Ozdogan, endamê meclîsî û serekê daîreyanê têkilîdaran Hemşaredare Bucak reyde bîyî.