Çeşmeyanê Îkramî yê verê çar nêweşxaneyan ra her roje 2 hezar kesan rê şorbaya germe
Şaredarîya Amedî ya Şaristanê Girdî, bi Çeşmeyanê Îkramî ke verê çar nêweşxaneyanê dewlete de yê rojanê hewteyî her roje teqrîben 2 hezar hemwelatîyan rê şorbaya germe vila kena. Nêweş, merdimê nêweşan û xebatkarê weşîye îkramî ra ke mabênê saete 07.00-09.00 de yeno kerdiş, îstîfade kenê.
Serekîya Daîreya Xizmetanê Komelkîyan Çeşmeyê Îkramî ke verê çar nêweşxaneyan de yê, bi serdbîyayîşê hewayî newe ra dekerdî xizmet. Şorbaya germe ke aşxaneyê şaredarîye de goreyê şertanê hîjyenî yena amadekerdiş, verê Polîklînîkê Nêweşxaneyê Unîversîteya Dîcle, Nêweşxaneyê Perwerde û Cigêrayîşî yê Gazî Yaşargîlî, Nêweşxaneyê Dewlete yê Selahattîn Eyyubî û Nêweşxaneyê Zîyayîş û Nêweşîyanê Gedeyan de hemwelatîyan rê yena vilakerdiş.
‘Ma wazenê zerrîya înan germ bikerê’
Mudira Şûbeyê Xizmetanê Komelkî û Karanê Hetkarîye Nîhale Bozhan Ozbek va: “Ma bi Çeşmeyanê Îkramî ke çar cayanê şaristanê ma de verê nêweşxaneyanê dewlete de yê, nêweşan, merdimanê nêweşan û xebatkaranê weşîye rê şorbaya germe vila kenê.”
Ozbeke dîyar kerd ke seba hemwelatîyanê ke serê sibayî rew yenê nêweşxane û mecbur manenê zaf bipawê hewayo serd nê prosesî hîna zehmet keno û va: “Ma wazenê bi şorbaya germe tayê bo zî zerrîya înan germ bikerê û bidê hîskerdiş ke ma kişta înan de yê.”
Ozbeke va ke Çeşmeyê Îkramî rojanê hewteyî her roje mabênê saete 07.00-09.00 de xizmet danê.
