Cinî atolyeyan de bi berhemardişî benê xurt
Cinîyê ke beşdarê Atolyeya Dîzaynê Moda û Tekstîlî ya Merkezê Kursan ê Sumerparkî yê Şaredarîya Amedî ya Şaristanê Girdî benê, qalibvetişî ra heta birnayîş û deştişî heme qonaxanê viraştişê kincan musenê. Kursîyerê ke kincanê xo derzenê û eşkenê karê tamîrî yê keyeyî bikerê, atolye de tecrubeyanê xo pare kenê û piştîpêdayîşê xo zî xurt kenê.
Atolyeya Dîzaynê Moda û Tekstîlî ke çarçewaya Kursanê Huner û Perwerdeyê Meslekî yê Amedî (DÎSMEK) de binê banê Serekîya Daîreya Xizmetanê Komelkîyan de xebitîyena, îmkan dana cinîyan ke bibê wayîrê meslekî û beşdarê berhemardişî bibê. Perwerdeyan de ke Merkezê Kursan ê Sumerparkî de rojanê hewteyî dewam kenê, cinî agahîyanê teorîkan ra teber bi xebatanê pratîkan qonaxanê cîyayan ê dîzaynê moda musenê.
Heme qonaxê dîzaynê moda yenê musnayîş
Bernameyê perwerdeyî de babetê sey fikirîyayîşo afirnayox, zanayîşê rengan û prensîbê dîzaynî yenê qiseykerdiş. Perwerdeyanê amadekerdişê qaliban de qalibê kincanê bingeyinan ê sey etek, pantolon û bluzî yenê viraştiş. Perwerdeyanê deştiş û berhemardişî de derheqê tewiranê qumaşî de agahî dîyena û deştişê destî ra heta utîkerdiş û xemilnayîşî teknîkê cîyayî yenê musnayîş.
‘Ma heme teknîkanê deştişî musnenê’
Perwerdekara kursê tekstîlî Havva Kaval va ke hewte de panc rojî, serê sibayî û nêmroje bi di grûban perwerde danê û wina dewam kerd: “Ma peymegirewtiş û dîzaynkerdişê rîyê çarşef, lihêf û balişnayan zî mojnenê. Wexto ke karê kursîyeran ê tamîrî bibê ma deştişê perdeyan, kilmkerdiş û newe ra deştişî zî musnenê.”
Kavale dîyar kerd ke kurs tena perwerdeyo meslekî nîyo û va: “Ma tîya sey keyeyêk pîya wext vîyarnenê. Ma tîya yê ke înan hem hetê ekonomîkî ra hem zî hetê manewî ra xurt bikerê.” Kavale va ke êyê ke kursî bi serkewtiş temam kenê belgeya bitesdîqê Wezaretê Perwerdeyê Neteweyî (MEB) gênê.
‘Ma tamîrê keyeyî zî bi xo kenê’
Kursîyeran ra Nurcane Kiliç va: “Ez her het ra zaf memnûn a. Ma yenê, sosyal benê. Na vayîye de teber ra herînayîşê çîyêk hema-hema îmkan nîyo. Ma kincanê xo derzenê, êdî mecbur nîyê teber ra kincan biherînê. Ma tamîrê keyeyî zî bi xo kenê.” Kiliçe tewsîye kerd ke herkeso ke tenatîye anceno û keye de bêzar beno beşdarê nê kursan bibo.
‘Ez nêweşîya xo xo vîr ra kena, sosyal bena’
Kursîyeran ra Fatoşe Yaşar va ke serra 2023î ra nat beşdarê kursanê DÎSMEKî bena û bi tewsîyeya doktorî ameya kurs. Yaşare va: “Ez nêweşîya xo xo vîr ra kena, sosyal bena. Ez derzena, ez beşdarê kursanê hunerê destî zî bîya. Bi embaz û mamosteyanê xo ez tîya xo zaf weş hîs kena. Seba ke nê îmkanî dayî ma ez şaredarîye rê zaf sipas kena.”
