Serekîya Daîreya Çapemenî, Weşan û Têkilîyanê Şarî pêdîyayîşanê şarî organîze kena ke hemwelatî bieşkê taleb, pêşnîyaz û fikrê xo direkt îdareyê şaredarîye ra vajê. Çarçewaya nê xebatan de bi hemkarîya Şaredarîya Farqînî Taxa Baglarî ya Farqînî de pêdîyayîşê şarî ame kerdiş. Pêdîyayîşî de ke Keyeyê Tazîyeyî yê Feridunî de ame kerdiş, Hemşaredaranê Şaredarîya Amedî ya Şaristanê Girdî Serra Bucak û Emîn Ayî, Hemşaredarê Şaredarîya Farqînî Kadri Esenî, berpirsîyaranê Rêxistina Qeza ya DEM Partî ya Farqînî, endamanê meclîsê DBB'yî, Hetkara Sekreterê Pêroyî Muhabbet Erdogmuşe, serekanê daîreyan, berpirsîyaranê DÎSKÎ û zaf hemwelatîyan ca girewt. Rojeva sereke yê pêdîyayîşî çareserîyê daîmî yê problemanê binawanî bî ke laser û eştişê awe ra dima vejîyayî meydan. Detayê projeyê kanalî yê DÎSKÎ ke baxçe û milkanê hemwelatîyan ra vîyareno, ameyî parekerdiş.

Hemşaredar Bucak vat ke ê çareserîye gêrenê û na çareserî tena seba ewroyî ney, seba ameyoxî zî do bibo. Bucak ard ziwan ke taxe û kuçeyî plan nêbîyê, coka binawanî zî plan nêbîya û hem şar hem zî şaredarî zehmetî vînenê: "Ganî ma hem gedeyanê xo hem zî cuya xo bipawê. Coka ewro ma wazenê munaqeşe bikerê û pêşnîyazanê şima bieşnawê. Beno ke na çareserî se ra se zerrîya heme kesan rehet nêkero, la ma wazenê tîya dîyalog ronê. Wa zimistano ke yeno, şarê ma û ameyoxê ma rê xetere mebo." Bucak bale ante a ser o ke DÎSKÎ dimayê erdlerzê 2023î bi cehdêko gird Ajansê Averşîyayîşî yê Japonya (JICA) ra seba Farqînî û Erxenî hîbe girewto û no hîbe do Farqînî rê bêro xerckerdiş.

Hemşaredar Ayî zî vat ke heme şaredarî ganî Şaredarîya Şaristanê Girdî reyde pîya nê probleman ser o bixebitîyê: "Seba nê problemî ke sey nêweşîyêk dormeyê Farqînî ser o tesîr keno, ardimê ma pêrune lazim o. Ganî çareserîyêka hempare bêra dîyayîş."

Hemşaredarê Şaredarîya Farqînî Kadri Esenî vat ke kêmanîyê înan est ê, la nê kêmanî îhmalî ra ney, bêîmkanîye ra yê. Esenî ard ziwan ke Taxanê Feridun û Baglarî de problemê binawanî est o: "Verê cû destûr ameyo dayîş ke şaristan çem û rayîrê awe ser o bêro awankerdiş û no zî bi laser û eştişê awe reyde beno problem. Seba çareserkerdişê ney ma Şaredarîya Şaristanê Girdî û DSÎ reyde têkilî ronanê. Ganî kanalêk bêro viraştiş ke awe tede biherikîyo, ma piştîdayîşê şima wazenê."

Qiseykerdişan ra dima hemwelatî û muxtarî derheqê kêmanîyanê binawanî, xebatanê rayîran û zerarê laseran de problemê xo yê kronîkî ardî ziwan. Hemwelatîyan vat ke projeyê kanalî rind vînenê, la herêmanê Sîteyê Sanayî, Fidan Kent û Kanalê Girdî de xebatê binawanî kêmî yê û zimistanî de kanalîzasyon xetimîyeno, boya pîse û qilêrine vejîyena. Hemwelatîyan waşt ke sere de Kuçeyê Gulî, rayîrî bi çareserîyanê demdergan bêrê asfaltkerdiş û verê serawanî de problemê binawanî temam bêrê hewanayîş.

Çarnayox: Mehmet Olmez