Mudirîya Şûbeyê Kultur û Turîzmî ya Serekîya Daîreya Kultur, Huner û Karanê Komelkîyan, seba cinîyanê ke Merkezanê Cuya Cinîyan ê Serekîya Daîreya Polîtîkayanê Cinîyan de kurs gênê û seba wendekaranê Mektebê Mîyanênî yê Bereketli yê Erxenî û Mektebê Mîyanênî yê Dokmetaşî yê Yenîşehîrî, qezaya Gêlî rê di programê gêrayîşî yê cîyayî organîze kerdî.

Gêl de cayê tarîxî û bawerîyî

Beşdaran Gêl de Kelaya Gêlî, Tirba Pêxember û Sehabeyan, maqamê pêxemberan Hz. Zulkifl û Hz. Elyesa, Camîyê Hz. Elyesayî, Kelaya Asûrî û Mezelê Padîşahan zîyaret kerdî. Naye ra teber, rindîyê xozayî yê qeraxê Çemê Dîcle û dewlemendîyê kulturî, tarîxî, bawerîyî û xozayî yê qeza zî ameyî daşinasnayîş.

Şaristan de cayê tarîxî û kulturî

Gêrayîşanê bînan de beşdarî cayê muhîmî yê tarîxî, kulturî û xozayî yê şaristanî yê sey Zereyê Sûrî, Îçkale, Muzeyê Arkeolojî, Camîyo Gird, Kilîseya Surp Giragosî, Keyeyê Dengbêjan, Muzeyê Şaristanî yê Cemîl Paşayî, Pirdê Des Çiman û Baxçeyê Hewselî gêrayî.

Çarçewaya “Gêrayîşanê Daşinasnayîşê Şaristanî yê Payîzî” de gêrayîşê cayanê kulturî, xozayî, tarîxî û bawerîyî yê şaristanî do heta 15ê teşrîna peyêne dewam bikerê.

Çarnayox: Mehmet Olmez