Konferans badê roniştiş û erjnayîşanê rojê qedîya. Hemşaredarê Şaredarîya Şaristanê Girdî Serra Bucak û Emîn Ay, hemşaredarê qezayan, endamê meclîsê DBB'yî, Hetkarê Sekreterê Pêroyî yê DBB'yî Zerin Turk û Muhabbet Erdogmuş, serekê daîreyanê eleqedaran, edebîyatkarî, akademîsyenî û temsîlkaranê rêxistinanê komelê sîvîlî konferansî de ca girewt.

'Ma prosesî bi hêvî û berpirsîyarîye taqîb kenê'

Ayî dîyar kerd ke hem herême de hem zî dinya de dewrêkê tarîxî ra vîyareno ke tede bedilîyayîşê muhîmî yê sîyasî, komelkî û ekonomîkî benê û ma pêro Prosesê Aştîye û Komelo Demokratîk bi hêvî û berpirsîyarîyêka girde taqîb kenê ke ameyoxê şarê kurdan û heme komelê Tirkîya ra eleqedar o.

'Awankerdişê aştî berpirsîyarîya hempare ya heme waranê komelî ya'

Ayî bale ante ser o ke awankerdişê aştî tena berpirsîyarîya aktoranê sîyasîyan nîya, berpirsîyarîya hempare ya heme waranê komelî ya û vat: “Amed bi tarîxê xo yê hezaran serran, bi kulturê xo û vîrê xo yê komelkî yo qewetin hertim fikr, edebîyat, huner û têkoşînê komelkî rê merkezanê muhîman ra yew bîyo. Ma zanê ke çareserîya meseleyêka kokdare sey meseleya kurdan tena bi muzakereyanê sîyasîyan sînordar nîya. Awankerdişê aştîya menda eynî wext de xurtkerdişê vîrê komelî, îradeyê pîyaciwîyayîşî û erjanê demokratîkan wazeno.”

'Aştî şeklêkê cuye yo ke tede seypêyî û edalet pîya awan benê'

Ayî dîyar kerd ke aştî tena qedêyayîşê pêkewtişan nîya; şeklêkê cuye ya ke tede ziwan, kultur û nasnameyî bi azadî ciwîyenê û seypêyî, edalet û komelo demokratîk pîya awan benê. Ayî ard ziwan ke her vateyo ke nuştox, şaîr û roşnvîrî seba aştî vanê, piştîyêka biqîymete ya ameyoxê demokratîkî rê.

Ayî vat ke sey Şaredarîya Şaristanê Girdî bi fehmê îdareyê herêmkî yo demokratîk, beşdar, zafziwan û zafkulturî qerardar ê ke seba komelkîbîyayîşê aştî berpirsîyarîya xo bîyarê ca.

Burhan Sonmezî rê ‘Xelatê Rûmetî yê Amedî’

Badê qiseykerdişanê qedênayîşî Hemşaredarê Şaredarîya Şaristanê Girdî Serra Bucak û Emîn Ayî “Xelatê Rûmetî yê Amedî” Serekê PEN-a Mîyanneteweyî Burhan Sonmezî rê pêşkêş kerd.