Program Taxa Şehitlik a qezaya Yenîşehîrî de yew salone de ame viraştiş. Hemserekê Şaristanî yê DEM Partî yê Amedî Fatîme Îzol Levent û Yûnus Muratakan, Hemserekê Şaristanî yê DBP'yî yê Amedî Ahmet Dogan, Dayîkê Haştîye, endamê meclîsê DBB'yî, hemşaredarê qezayan, temsîlkarê rêxistinanê komelê sîvîlî û zaf hemwelatî beşdarê programî bîyî.

Hemşaredar Ay: Ma do mabênê heme şar û bawerîyan de haştîye awan bikerê

Hemşaredar Ayî ke programî de qisey kerd, ê kesan rê ke keda înan haştîya mabênê keyeyan de est a, sipas kerd û wina vat:

“Nika ma prosesê haştîye û komelê demokratîkî de yê. Ma hêvî kenê ke ma do mabênê heme şar û bawerîyan de haştîye awan bikerê. Seba ke ma biresê nê amancî, ganî verê her çîyî ma haştî û tifaqê xo yê zereyî awan bikerê. Rayîrê ney zî no yo: eke mabênê keyeyan yan eşîran de problemêk est o, ganî ma înan pê bîyarê. Tifaqê girdî bi tifaqanê qijan virazîyenê. Coka na game zaf muhîm û zaf erjaye ya.”

‘Haştî erjê hemparî yê heme merdimî yo’

Hemşaredar Ayî dîyar kerd ke eke sey Şaredarîya Şaristanê Girdî rol, mîsyon yan berpirsîyarîyêk înan rê kewena, ê her wext amade yê. Ayî qiseykerdişê xo wina qedêna: “Haştî erjê hemparî yê heme merdimî yo. Heme dîn û bawerîyan haştî merdiman rê kerda ferz. Kam ke na haştîye de keda xo est a, wa destê înan weş bê. Wa hezar rey est bê.”

Çarnayox: Mehmet Olmez