Hemşaredarê Şaredarîya Amedî ya Şaristanê Girdî Emîn Ay, beşdarê rayîrşîyayîşî bî ke bi vengdayîşê Meclîsê Cinîyan ê DEM Partî û dezgehanê cinîyan, vera qirkerdişanê cinîyan û şîdetê camêrdan ê vera cinîyan, Baglarî ra heta Parka Qerenfîlî ame organîzekerdiş.

Hemserekê Şaristanî yê DEM Partî yê Amedî Yûnus Muratakan, Hemserekê Şaristanî yê DBP Ahmet Dogan, parlamenterê DEM Partî Mehmet Kamaç û Serhat Eren, hemşaredarê qezayan, Hemverfekê Meclîsê DBB'yî Ayhan Karatekin û zaf hemwelatî zî beşdarê rayîrşîyayîşî bîyî.

Hemşaredar Ayî ke badê rayîrşîyayîşî qisey kerd, dîyar kerd ke şîdetê vera cinîyan û qirkerdişê cinîyan netîceyê nêseypêyî û sîstemê serdestîya camêrdan ê.

Ayî bale ante ser o ke ganî cinî heme waranê cuye de bi seypêyî bêrê temsîlkerdiş û vat: “Komelêk de ke cinî tede azad nîyê, azadî, refah û aştî zî mumkin nîyê.”

Hemşaredar Ayî veng da ke piştîpêdayîşo ke cinîyan reyde yeno kerdiş, pîl bibo.