Hemşaredar Ay beşdarê eşkerayîya çapemenîye bî ke verê awanîya şaredarîye de derheqê hêrişê çekdarî yê 1ê teşrîna verêne de ame organîzekerdiş. Hemserekê Şaristanî yê DEM Partî yê Amedî Fatîme Îzol Levent û Yûnus Muratakan, Hemserekê Şaristanî yê DBP'yî Ahmet Dogan, Parlamentera DEM Partî ya Amedî Sevilay Çelenk, Hemşaredarê Şaredarîya Bismilî Mizgîn Ekin û Guven Tanrikulu, hemşaredarê qezayan, endamê meclîsî, personelê şaredarîye û hemwelatî zî beşdar bîyî.

Parlamentera DEM Partî Sevilay Çelenk dîyar kerd ke ê seba hadîseyî zaf xemgîn bîyî û kulturê partî û şaredarîye de tu tepşo ke tede potansîyelê şîdetî est o, nêyeno qebulkerdiş. Çelenk vat: “Heme tedbîrê lazimî do bêrê girewtiş û ma do qet reyna seba sebebêko winasî pêser nêbê.”

Hemşaredar Ayî hêriş şermezar kerd

Hemşaredar Ayî hêriş şermezar kerd û vat: “Ma no qet qebul nêkerd û do qet qebul nêkerê. Ma do nêverdê ke hêrişê winasî embazê ma, îradeyê şarê ma û îdareyê şarî hedef bigîrê. Wa heme kes bizano ke no hêriş vera sîyasetê demokratîkî yo. Cewabê ma bi xebate û sîyasetê demokratîkî beno; vera na zordarîye cewabê ma pawitişê aştîye beno.”

‘Na mesele sey meseleyêka şexsî nêeşkena bêra nirxnayîş’

Hemşaredar Ayî ard vîrî ke îdareyê herêmkî bingeyê demokrasî yê; cayo ke demokrasî tede çin a, aştî nêbena, cayo ke aştî tede çin a, azadî nêbena. Ayî wina dewam kerd: “Cayo ke azadî tede çin a, cuyêka birûmet çin a. Prosesê Aştîye û Komelê Demokratîkî de hadîseyêko winasî qet nêyeno qebulkerdiş. Qewetê ma şarê ma yo; şarê ma do wayîrê sîyaset, têkoşîn û îradeyê xo bivejîyo.”

Hemşaredar Ayî venga hukmatî da û vat: “Eke vernîya nê hadîseyî nêro girewtiş, do hadîseyanê bînan rê rayîr abibo.” Ayî dîyar kerd ke ganî çîyê huqûqî bêrê caardiş.

Zîyaretê hemşaredaranê Bismilî

Badê qiseykerdişan, Hemşaredar Ayî û heyeto ke hetê ey de bî, Hemşaredarê Şaredarîya Bismilî Mizgîn Ekin û Guven Tanrikulu zîyaret kerdî û înan ra vat: “Kefaret bo.”

Tadayox: Mehmet Olmez