Daşinasnayîşî de ke Merkezê Kultur û Kongre yê Çand Amedî de ame organîzekerdiş, Hemşaredarê Şaredarîya Amedî ya Şaristanê Girdî Emîn Ay, hemşaredarê qezayan, Hemvatoxê Meclîsê DBB'yî Ayhan Karatekîn, endamê meclîsî, Hemsereka Konseya Şaristanî Dîlane Aydin, temsîlkarê Heyetê Koordînasyonî yê Wîlayetî yê TMMOB'yî yê Amedî û akademîsyenan ca girewt.

Berhemê cigêrayîşêkê warî yê demdergî

Derheqê prosesê amadekerdişê eserî de ke hetê Heyetê Koordînasyonî yê Wîlayetî yê TMMOB'yî yê Amedî ra ame weşanayîş, agahî ameyî parekerdiş. Ame dîyarkerdiş ke kitab ke amanc keno nebat û zafrengîya florîstîke ya Baxçeyanê Hewselî eşkera bikero, berhemê cigêrayîşêkê warî yê demdergî yo. Ame îfadekerdiş ke Prof. Dr. A. Selçuk Ertekîn û Yrd. Doç. Dr. Zekî Kanayî awankerdişê çarçewaya zanistîye û erjnayîşê doneyanê warî de piştîyêka muhîme daya û şarê herême zî bi çimdarîya xo yê erazî piştî daya.

‘Baxçeyê Hewselî bi hezaran serran o ke merdimîye weye kenê’

Hemşaredar Emîn Ay ke bernameyî de beşdaran reyde ame têhet, Prof. Dr. A. Selçuk Ertekînî rê plaket da. Ayî ke dima qisey kerd, va ke ê tim bi tarîxê şaristanî yê qedîmî sereberz ê.

Ayî îfade kerd ke Baxçeyê Hewselî û Çemê Dîcleyî ke parçeyê tarîxê Amedî yê qedîmî yê, bi hezaran serran o ke merdimîye weye kenê la seba nêzdîbîyayîşê serdestan nê warî ameyî xeripnayîş.

Ayî va ke senî ke mayêk wayîrê gedeyê xo vejîyena û ey pawena ganî her hemwelatî zî wina wayîrê tarîxê Amedî û Baxçeyanê Hewselî bivejîyo. Ayî sere de nuştoxê kitabî Prof. Dr. A. Selçuk Ertekîn heme kesanê ke amadekerdişê eserî de kede daya, înan rê sipas kerd.