Hemşaredarê Şaredarîya Amedî ya Şaristanê Girdî Emîn Ayî qedênayîşê roniştişanê roja verêne ya Sempozyûmê “Heqê Qiseykerdişî: Vîrê Komelî, Şahîdîye û Travma” de qisey kerd û vat: “Çîyo ke ma hewceyê ci yê, bêvengî ney, vate yo; înkar ney, raştî ya; xo vîr ra kerdiş ney, vîrardiş o; heyfgirewtiş ney, edalet o û pêkewtiş ney, aştîya demokratîk a.”

Sempozyûm ke hetê Şaredarîya Şaristanê Girdî û Komeleya Xebatanê Travmayî ra ame organîzekerdiş, Salona Konferansî ya Alî Emîrî de roje heta şan dewam kerd.

'Şahîdîye vera înkarî pawitişê raştîye ya'

Ayî dîyar kerd ke vîrê komelî nasname û wijdanê komelî yo; rîbirîbîyayîşê vîrî vîyarteyî de mendiş nîyo, akerdişê rayîrê ameyoxêkê biedalet, azad û demokratîkî yo. Ayî vat: “Şahîdîye tena qalkerdişê çîyanê ciwîyayeyan nîya; eynî wext de vera înkarî pawitişê raştîye ya. Bê ke ma nê birînan reyde rî bi rî bibê, înan fehm bikerê û seba weşbîyayîşê înan mekanîzmayê komelkî awan bikerê, awankerdişê aştîyêka komelkîye ya raştikêne mumkun nîya.”

Ayî bale ante ser o ke rîbirîbîyayîşê vîyarteyî tewanbarkerdiş yan heyfgirewtiş nîyo, şertê bingeyin ê awankerdişê ameyoxêkê hemparî yo û vat: “Komelanê ke raştîye reyde rî bi rî nêbenê de înkar newe ra berhem beno; cayo ke înkar tede bo, aştîya menda û cuya demokratîke aver nêşina.”

Roja dîyine de Rayîrşîyayîşê Vîrî û atolye

Roja dîyine ya sempozyûmî, 8ê teşrîna peyêne yewşemeyî saete 09.30 de Rayîrşîyayîşê Vîrî bi rayberîya Derya Bozarslan Meydanê Berê Koyî ra do dest pêbikero; saete 14.30-16.00 de zî bername bi Atolyeya “Çîyê ke Vîrê Ma de Mendî” do biqedîyo.