Konseya Şaristanî, çarçewaya Prosesê Aktuelkerdişê Planê Îdareyê Warî de ke bi amancê pawitiş, neslanê ameyoxan rê resnayîş û goreyê krîteranê Mîrasê Dinya yê UNESCOyî bi nêzdîbîyayîşêko temamker îdarekerdişê Peyzajê Kulturî yê Kelaya Amedî û Baxçeyanê Hewselî yeno ramitiş, Merkezê Kultur û Kongreyî yê Çand Amedî de kombîyayîşê agahdarkerdişî kerd. Hemşaredare Serra Bucak, hemşaredarê şaredarîyanê qezayan, Sekreterê Pêroyî yê DBByî Serdar Bakiroglu, Hetkara Sekreterê Pêroyî Muhabbet Erdogmuş, akademîsyenî, endamê Konseya Şaristanî û hemwelatîyî beşdarê kombîyayîşî bîyî.

Hemşaredara Bucak kombîyayîşî de qisey kerd û bale ante rolê beşdarîye, şefafîye û îradeyê herêmkî yê weçînîyayî ser o: "Prensîbê tewr muhîm ê seyrê polîtîkî beşdarî û şefafî ya. Ma demêko derg ney ra bêpar verdayî."

Bucake derheqê prosesê badê 2016î de vat: "2016 de hem qeyûman hem zî prosesê pêkewtişî ra dima Sûrîçî bi temamî bêselahîyet ame verdayene, Serekîya Îdareyê Warî Şaredarîya ma ra ame girewtene û demêko derg nêame dîyarkerdene ke do key bêro dayene. Wayîrîkerdişê yew warî tena bi fikr û çalakîya hemparî ya îdarekaranê herêmkîyan, dezgehanê herêmkîyan û komelê sivîlî beno.”

'Seba pawitişê mîrasê dinya hewcedarîya planêkê çalakî esta'

Bucake vat: "Ganî planêkê çalakî yo cidî verê ma de bibo. Ma rapor girewt û wend; xirabîye gird a. Ma senî peyser bîyarê — berpirsîyarîyêka girde her kesî ser o est a. Wezaretî ra hetanî Wezaretê Cugeh û Şaristanîye, berpirsîyarîyêka cidî ya dîplomasî ma ser o est a. Wext ravêrdo ke ma na mesele bikerê hedefêkê çalakî."

Kombîyayîşî de Hemserekê Konseya Şaristanî Serdar Keskîn, Serekê Daîreya Îmar û Şaristanîye Murat Emînoglu û plankerê şaristanî Serdar Nîzamoglu zî qisey kerd; beşdaran zî waştiş û pêşnîyazê xo ardî ziwan.

Tadayox: Mehmet Olmez