Welatîyê taxa Agaçli vanê ke projeyê GESî yo ke wazenê nêzdîyê 300 donim erdî ser o awan bikerê, warê cuya înan tehdît keno; ê 47 roji yo ke vera projeyî nobete gênê. Rêxistinê DEM Parti, Parlamentera DEM Parti ya Amedî Adalet Kaya, hemşaredarê şaredarîyanê qezayan û zaf welatîyan zî piştî daye nobete.

Hemşaredara Bucak: Ma nêverdanê na xebate dewam bikera

Hemşaredara Serra Bucak dîyar kerd ke herême tebîetêka bêhempa ya û tede hewzeya awe est a û vat: "Ma vera nê xebatan ê. Ma nêverdanê na xebate dewam bikera. Nika Mûş-Gimgim de zî wazenê RES (Santralê Enerjîya Vayî) awan bikerê." Bucake Wezarete zî rexne kerd û vat ke raporê ÇEDî raştîye nêmojnenê. Bucake da zanayene ke herême bêwayîr nîya û vat: "Ruhê ma tîya yo, ruhê şima tîya yo. Ez bawer kena ke ma pîya vera nê projeyî do piştî bidê şima."

'Enerjîya ke merdiman warê cuye ra bêpar kena, pake nêbena'

Parlamentera DEM Parti ya Amedî Adalet Kaya zî vat: "Nê projeyan rê vanê 'Enerjîya Keske', 'Enerjîya Pake'. Enerjîyêka ke merdiman warê cuye û erdê înan ra bêpar kena, nêbena enerjîya kesk û pake. No versîyonêkê bîn ê polîtîkaya vengkerdişî ya serranê 90an o."

Welatîyanê herême zî dîyar kerd ke eke proje bêro awankerdene, tebîet û hewzeyê awe do zirar bivînê û ê do çalakîya nobete dewam bikerê. Qiseykerdişan ra dima hemşaredaran û heyetê înan warê GES’î ra cigêrayîşî kerdî.

Tadayox: Mehmet Olmez