Hemşaredaran serekanê odayanê esnafan reyde derheqê problem û rayîranê çareserîye de qisey kerd
Hemşaredarê Şaredarîya Amedî ya Şaristanê Girdî Serra Bucak û Emîn Ay serekanê odayanê esnafan reyde ameyî têhet û problem û pêşnîyazê çareserîye erjnayî. Kombîyayîşî de ke tede talebê derheqê kontrol, xercê ruxsetan, xebatê binawanî û asfaltî de ameyî ziwan, Hemşaredare Bucake dîyar kerd ke do yewînanê eleqedaran reyde xebata hempare bikerê.
Hemşaredaran serek û îdarekaranê odayan reyde ameyî têhet ke girêdayeyê Yewîya Odayanê Esnaf û Seneatkaran a Amedî (DESOB) yê. Hemşaredarê qezayanê merkezî, endamê meclîsî, Sekreterê Pêroyî yê DBB'yî Serdar Bakiroglu, Serekê DESOB'î Alîcan Ebedînoglu û serekanê daîreyan zî kombîyayîşî de ca girewt.
Serekanê odayan problemê xo ardî ziwan
Serekanê odayan dîyar kerd ke sebebê cayanê karan ê nêqeydkerdeyan û rotoxanê gêrayoxan ra mexdûr benê; waşt ke kontrolî zêde bibê û ekîbê zabita vera rotoxanê gêrayoxan tedbîranê bitesîran bigîrê. Înan waşt ke esnafê qijî vera marketanê zincîran bêrê pawitiş, kontrolê hîjyenî zêde bibê û krîterê “Beyraqa Sipîye” newe ra bêrê erjnayîş. Serekanê odayan sewbîna waşt ke xercê ruxsetan ê şaredarîyanê qezayan bêrê rastkerdiş; talebê xo yê derheqê asfalt û varanê zafî de zî ardî ziwan.
Hemşaredare Bucake bale ante hemkarî û koordînasyonî ser o
Bucake talebî yew bi yew not kerdî û dîyar kerd ke xebatê asfaltî tayê rayîran de do wisar û hamnanê ameyoxî de hîna zaf dewam bikerê. Bucake vat ke seba problemanê qezayan do kombîyayîşê herêmkî bêrê plankerdiş û gamê asankerdoxî yê ruxsetan do koordînasyonê çar şaredarîyanê qezayanê merkezî û Şaredarîya Şaristanê Girdî de bêrê erjnayîş.
Bucake dîyar kerd ke Borsaya Heywanan mîyanê şaristanî de menda û emrê awanîye qediyayo; do no zimistan seba ke kes mexdûr nêbo restorasyon û miqateyêko demkî bêro kerdiş û xebatê borsaya newîye zî dewam kenê.
'Royê Sinekî de ma do probleman çareser bikerê'
Bucake derheqê xebatanê binawanî yê dorûverê Royê Sinekî de vat: “Problemê Royê Sinekî kronîk o, la ma do ey çareser bikerê. Hêzê ma yê sermîyangozarî û malî est o. DÎSKÎ 2,5 serran de xebatêka zaf girde kerde, la nêaseno çunke ma binawanî virazenê. Ma bi kîlometreyan kanalîzasyon ronaye, xeta îsaleyî ya newîye akerde û awguznayîşanê paketan akenê. Wisarî de DÎSKÎ do bikewo uca û serra ameyoxe herkes do Royê Sinekî de goreyê waştişê xo pîknîk bikero.”
Bucake waşt ke DESOB û odayê eleqedarî rasterast beşdarê prosesanê tespîtkerdişê tarîfe û rayîcan bibê ke esnafê sey mînîbuskar, otobusê şarî, taksîkar û firinkarî tede est ê. Kombîyayîş bi qerarê kombîyayîşanê hîrayan qedîya.
