Konferans ke tede rolê edebîyat, ziwan û roştîbîyayîşî yê aştî, pêkerdiş û pîyaciwîyayîşî de ame qiseykerdiş, bi piştîdayîşê Şaredarîya Amedî ya Şaristanê Girdî û şaredarîyanê Peyas, Rezan, Bajaro Newe û Sûrî Salona Kombîyayîşî ya Alî Emîrî ya DBB'yî de bî. Hemşaredarê Şaredarîya Şaristanê Girdî Serra Bucak û Emîn Ay, hemşaredarê qezayan, endamê meclîsê DBB'yî, serekê daîreyanê eleqedaran, edebîyatkarî, akademîsyenî û temsîlkaranê rêxistinanê komelê sîvîlî konferansî de ca girewt.

Hemşaredare Bucak: Aştî bi ziwano ke ma qisey kenê, awan bena

Bucake qiseykerdişê akerdişî de vat: “Ma vateyê ‘Her ziwan dinyayêk a’ rind zanê. Wexto ke ziwanêk bêveng beno, dinyayêk vindî bena. Ma ewro tîya yê ke na dinya xo newe ra qezenc bikerê û barê awankerdişê aştî sivik bikerê.”

Bucake nuştox û hunermendê ke ziwan û kulturê kurdkî pawitî û kiriştî, û nuştoxê şaranê bindestan ardî vîrî; bale ante ser o ke herême reyna hêvîya aştî ancena. Bucake vat: “Aştî tena bi muzakereyanê serê maseyî awan nêbena; eynî wext de bi ziwano ke ma qisey kenê, awan bena. Aştîyêka ke hurmetê ziwanê şaran nêkena, raştî de aştîyêka temame nîya.”

'Vateyê azadî şaranê azadan afirnenê'

Bucake ard vîrî ke zaf nuştoxan seba vateyanê xo bedelê giranî dayî; nuştox, weşanger û rojnamegerê kurdan ameyî tepîştiş, surgun bîyî û ameyî kiştiş, kitabî ameyî qedexekerdiş û gedeyî seba ke bi ziwanê dayîke qisey kenê, ameyî cezakerdiş. Bucake vat: “Şarê ke eşkenê bi azadî qisey bikerê, binusê, dêrî vajê û gedeyanê xo bi nê ziwanî pîl bikerê, eşkenê şaranê bînan reyde bi aştî biciwîyê. Wexto ke merdimî eşkenê raştîyanê xo bê tersî vajê, hewcedarîya hêz û şîdetî nêmanena. Vateyê azadî şaranê azadan afirnenê; ganî şarê azadî zî bi aştî biciwîyê, biwanê û binusê.”

Bucake dîyar kerd ke mêmandarîya konferansî rûmetêka girde ya û hema zî sewîyeya fermîye de vernîya qiseykerdişê ziwanê kurdkî yê kuçeyan de asteng est ê; ard ziwan ke bi xoverdayîş û keda nuştox û şaîran û piştîya goştar û wendoxan zaf şa bena. Badê qiseykerdişanê akerdişî konferans bi roniştişan dewam kerd.