Nobeta edalet û vîrî kewte hewteyê xo yê 4. ke Torra Têkoşînê Vera Şîdetî vernîya Edlîyeya Amedî de dest pêkerd ke bale biancîya qirkerdişanê cinîyan ser o û vera mekanîzmayanê şîdetî bêro vindertiş ke sîstemê serdestîya camêrdan berhem dano. Hemşaredara Şaredarîya Şaristanê Girdî Serra Bucak, hemşaredarê qezayan, temsîlkarê rêxistinanê komelê sîvîlî û zaf cinîyan piştî daye nobete.

Çalakîye do des hewteyî her sêşemeyî eynî saete de bêra kerdiş; amanc o yo ke cinîyê ke ameyî kiştiş tena sey îstatîstîkan ney, bi name, cuye û hîkayeyanê xo bêrê vîrardiş.

'Kiştişê cinîyan şexsî nîyê'

Eşkerayîya çapemenîye ya hempare de ame vatiş: “Hedefgirewtişê cinîyan ê sîstematîk qirkerdişê cinîyan o; nê kiştişî şexsî nîyê, netîceyê sîstemê serdestîya camêrdan ê.” Eşkerayîye de bale ancîya ser o ke vîr tena vîrardiş nîyo, pawitişê heqê cuye yê cinîyan o; ame waştiş ke cinî wextê ciwîyayîşî de bêrê pawitiş, muracatê înan bi cidîyet bêrê erjnayîş û dewlete wezîfeyanê xo yê pawitişî bê kêmanî bîyara ca. Nobete de hîkayeyê cinîyan ameyî wendiş ke 18–26ê teşrîna verêne de Tirkîya de ameyî kiştiş.

Hemşaredare Bucak: Bêrê ma na çalakîye pîya xurt bikerê

Hemşaredare Serra Bucak dîyar kerd ke nobete zaf biqîymet a û vengdayîşê dezgeh û rêxistinanê cinîyan eşkera yo. Bucake ard ziwan ke vernîya dezgehê berpirsîyarî de yê ke faîlan ra hesab nêperseno û cipersayîşan seke ganî bibê, nêramneno; venga cinîyan da ke her sêşemeyî saete 12.30 de beşdarê nobete bibê ke vernîya Edlîyeya Amedî de bena. Bucake vat: “Ma wazenê tîya de her hewte zêde bibê û na çalakîye dewam bikerê. Vengdayîşê ma ciwanan, unîversîtijan û heme cinîyanê Amedî rê yo: Bêrê ma pîya nê piştîpêdayîşî, na çalakîya vîrî, na çalakîya vîrardişî xurt bikerê. Ez şima hemînan rê sipas kena ke şima beşdar bîyî.”

Çarnayox: Mehmet Olmez