Tarîx bar beno...
⏳Bar beno...
UNESCO Dünya Mirası
10.11.2015
Bilindiği üzere, “Diyarbakır Kalesi ve Hevsel Bahçeleri Kültürel Peyzaj Alanı”, 2015 yılında UNESCO Dünya Mirası Listesi'ne kaydedilmiştir.
Hemşaredarî

Hemşaredare Bucak: Ganî têkoşînê cinîyan yew bibo û vindertişêko rêxistinkerde bimojno

Hemşaredara Şaredarîya Amedî ya Şaristanê Girdî Serra Bucak ke nobeta edalet û vîrî de qisey kerd ke hewt hewte yo verê Edlîyeya Amedî de dewam kena, bale ante ser o ke têkoşînê vera şîdetê cinîyan vindertişêko rêxistinkerde wazeno. Bucak ke bale ante ser o ke serra 2026î de şaristanî de 16 cinî ameyî kiştiş, veng da ke vera zîhnîyetê pederşahî û polîtîkayanê şîdetî têkoşînêko hempar bêro kerdiş.

Nobeta edalet û vîrî ke hetê Torra Têkoşînê Vera Şîdetî ra verê Edlîyeya Amedî de dest pêkerd, kewte hewteyê xo yê 7.. Hemşaredare Serra Bucak, Hemsereka Şaristanî ya Partîya Seypêyî û Demokrasî ya Şaran (DEM Partî) Fatime Uzul Levent, hemşaredarê qezayan, temsîlkarê rêxistinanê komelê sîvîlî û zaf cinîyan nobete de ca girewt.

Nobete ke her sêşeme eynî saete de yena kerdiş, plan bîyo ke des hewteyî dewam bikera. Çalakîyan de yeno amanckerdiş ke cinîyê ke ameyî kiştiş tena sey îstatîstîkî ney, bi name, cu û hîkayeyanê xo bêrê vîrardiş.

‘Yew nasnameyê înan o pêroyî est o, o zî cinîbîyayîş o’

Bucak va: “Cografyayê tu cinîya ke cuye ra ameya abirnayîş çin o. Yew nasnameyê înan o pêroyî est o, o zî cinîbîyayîş o. Yew nasnameyê înan pêrune est o, o zî hetê merdimanê xo yê tewr nêzdîyan ra kişîyayîş o.” Bucak bale ante ser o ke ganî têkoşînê cinîyan Amed ra heta Çanakkale û Afyonkarahîsarî bibo yew û vindertişêko rêxistinkerde bimojno.

‘Cinî do qet hesabpersayîşî ra fek nêveradê’

Bucak ke bale ante ser o ke kiştişê cinîyan polîtîk o, wina va: “Na cografya de vengê cinîyan est o ke vanê polîtîkayêka bîne mumkin a. Cinî do qet hesabpersayîşî ra fek nêveradê. Vengê ma îqtîdar û dewlete rê no yo: Polîtîkayanê xo yê vernîgirewtişê şîdetê vera cinîyan newe ra biewnîrê, goş bidê plananê çalakî ke îdareyê herêmkî û rêxistinê cinîyan ronanê vernîya ma.”

16 cinîyê ke serra 2026î de şaristanî de ameyî kiştiş

Bucak va: “Tena şaristanê ma de serra 2026î de ke hema nêqedîyaya 16 cinî ameyî kiştiş. Nê ê yê ke bi fermî sey ‘hetê merdimanê xo yê tewr nêzdîyan ra ameyî kiştiş’ qeyd bîyê. Peyê merdişanê şikbaran, şaneşîye ra kewtişan û merdişanê cinîyan ê ke sey întîharî ameyî nawitiş de dezgehbîyayîşê camêrdîye û dewlete ke nê aqilî pak kena est ê. Ma wazenê ke nê polîtîkayan ra fek bêro veradayîş.”

Camêrdan rê vengdayîş

Bucak veng da camêrdan zî ke berpirsîyarî bigîrê û va: “Camêrdê ke faîlê eslî yê; kişta xo de, keyeyê cîranî de, kuçe de, şaredarîye de, sîyaset de, kotî îstîsmar, cîyakarî û şîdetê vera cinîyêk est o, mecbur ê ke naye eşkera bikerê û berpirsîyarî bigîrê. Ma do emrê qijî ra heta unîversîte dezgehanê perwerdeyî de neseypêyîya cinsîyetê komelkî îzah bikerê û sîstemo seypê û adil pîya awan bikerê.”

Badê qiseykerdişan hîkayeyê cinîyanê ke ameyî kiştiş, ameyî wendiş.

Tadayox: Mehmet Olmez

Pare Bike
ALO 153Bajarê Dostê Cinîyan