Kombîyayîş serekîya Hemserekanê Konseya Şaristanî Dîlan Aydin û Serdar Keskinî de, awanîya Konseya Şaristanî de ame viraştiş. Hemşaredare Bucak û endamê Heyetê Rayraberdişî beşdarê kombîyayîşî bîyî.

Xebatê aşma êlule û rojeva demê neweyî ameyî nirxnayîş

Kombîyayîşî de ame îlankerdiş ke Dîlan Aydin goreyê pêşnîyazê rêxistinanê cinîyan ê komelê sîvîlî sey Hemsereka Konseya Şaristanî ameye weçînayîş. Derheqê xebatanê aşma êlule yê konseye de pêşkêşîyêk ameye dayîş; xebatê hîrayêrkerdişê heyetî û aktîvîteyê demê nêzdî zî ameyî qiseykerdiş. Pêşnîyazê seba ke konseye hîna bitesîr û berdar bixebitîyo û kapasîteyê ci yê dezgehî xurt bibo zî ameyî nirxnayîş.

Hemşaredare Bucak bale ante awanîya konseye ya qewetine ser o

Hemşaredare Bucak îfade kerd ke ê keyfweş ê ke wezîfeyanê xo teslîmê Hemserekanê neweyan Serdar Keskin û Dîlan Aydin kenê. Bucak dîyar kerd ke Konseya Şaristanî ya Amedî wayîrê mîrasêko sîvîlî yo qewetin û awanîyêk a ke heta meclîsanê taxan resena; demê neweyî de Heyetê Rayraberdişî do pêardoxanê hîna hîrayan ra bêro meydan û no do bi eyînî kalîteyê xebatan ser o tesîr bikero.

Bucak bale ante ser o ke Şaredarîya Şaristanê Girdî do dewam bikera ke piştî bido Konseya Şaristanî û rolê asankerdoxî bigîro xo ser û vat: “Ma zanê ke cîya-cîyayîya Konseya Şaristanî, munaqeşeyê ke derheqê heme meseleyanê şaristanî de do bikera û proje û programê hemparî yê ke dima ra vejîyenê, zaf muhîm ê. Hewcedarîya awanîyêka sîvîle ya winasî her roje hîna zaf eşkera bena.”

Yewîna Tetbîqat û Xebata Aştîye do dekewo falîyet

Bucak îlan kerd ke qatê corênî yê awanîya Konseya Şaristanî ya newîye de, bi nameyê “Yewîna Tetbîqat û Xebatê Aştîye” yewînêka newîye do dekewo falîyet. Goreyê Bucak, bi na yewîne ke badê Forumê Aştî û Azadîya Komelkîye yê gulane xurt bîye, yeno amanckerdiş ke kapasîteyê dezgehî yê îdareyanê herêmkîyan zêde bibo û aştî cuya şaristanî û awanîya dezgehan de bibo bingeyêko sereke.

Keskin: Ma berpirsîyarîya pawitişê kulturê piştîpêdayîşî girewte

Hemserekê Konseya Şaristanî Serdar Keskinî vat: “Amed şaristanêk o ke bi hezaran serrî yo cuye tede bêvindertiş dewam kena. Sebebê ney tena şertê teknîkî nîyê; uca de dewlemendîyêka kulturî û edetêko kokdar ê piştîpêdayîşî est o. Ma wezîfe û berpirsîyarîya pawitişê nê mîrasî girewt.”

Çarnayox: Mehmet Olmez