Hemşaredara Şaredarîya Amedî ya Şaristanê Girdî Serra Bucak, yewinê Amedî ke îmtîhanê Sîstemê Vîyartişê Lîseyan (LGS) yê 2026î de heme persan rê cewabê raştî dayî û 500 puan girewt, awanîya Şaredarîya Şaristanê Girdî de qebûl kerdî. Zîyaretî de keye û mamostayê wendekaranê serkewteyan ke cuya perwerdeyî de keda xo est a, înan reyde bîyî.

Hemşaredare Bucak keyfweşîya xo ya zîyaretî arde ziwan û wendekarî seba serkewtişê ke qezenc kerdo, yew bi yew pîroz kerdî. Bucak bale ante potansîyelê şaristanî yê warê perwerdeyî û cehdê gedeyan ser o û qiseykerdişê xo de wina vat:

"Rîtûelêkê ma est o: têhetameyîşê ma wendekaranê ke şaristanê ma de 500 puan gênê û vîyarenê lîse reyde, keyeyanê înan reyde, eke biwazê mamostayanê înan reyde. Ma dîyarîyêka qije bidê înan, teyîd bikerê ke ma ê xo vîr ra nêkerdî û no serkewtiş serkewtişêko muhîm o û seba demê ameyoxî serkewtiş biwazê, rîtûelêkê ma yo wina esto, serra vîyarte zî ma kerd."

Hemşaredare Bucak keye û mamostayanê wendekaran reyde zî eleqedar bîye û heme perwerdekar û keyeyanê ke pîlbîyayîşê gedeyan de keda înan est a, înan rê sipas kerd.

Zîyaretî de hetê Hemşaredare Bucak ra wendekaranê serkewteyan rê dîyarîyê pîrozkerdişî ameyî dayene û fotografê vîrardişî ame girewtiş.

Zîyaretî de Hemşaredare Bucak ra teber, Hemvatoxê Meclîsê DBByî Ayhan Karatekîn, Hetkara Sekreterê Pêroyî ya DBByî Zerîn Turk û serekê daîreyan zî ca girewt.