Konferans mabênê 29ê êlule û 2ê teşrîna verêne de Merkezê Kultur û Kongre yê 15ê Temmuze yê Unîversîteya Dîcle de yeno organîzekerdiş. Roja verêne de Hemşaredare Bucak ra teber, Sekreterê Pêroyî yê DBB'yî Serdar Bakiroglu, Mudirê Pêroyî yê DÎSKÎ Mehmet Şerifoglu, Rektorê Unîversîteya Dîcle Prof. Dr. Kamuran Eronat, temsîlkarê dezgeh û sazgehanê pêroyî, zanyarî, cigêrayoxî, 25 dewletan ra 50 beşdarî û zaf mêmanî beşdarê konferansî bîyî.

‘Awe bingeyê cuy o’

Rektor Eronatî ke programî de qisey kerd, vat ke ê seba awe ameyê pêser; awe ameyoxê merdimîye rasterast eleqedar kena. Eronatî dîyar kerd ke awe tena çimeyêka xozayî nîya; bingeyê emnîyetê xidayan, berhemardişê ziraetî, averşîyayîşê ekonomîkî, domdarîya dorûverî û cuy a.

‘Nê erdî cayê vejîyayîşê medenîyetan ê’

Hemşaredare Bucak vat ke Amed de organîzekerdişê konferansî zaf bimana yo. Bucak dîyar kerd ke Çemê Dîcle û Firatî cayê vejîyayîşê medenîyetan ê; çunke nê erdan ra herikîyenê û cuye danê.

‘Ganî ma estbîyayîşê awe bipawê’

Bucak vat: “Ganî ma şaristananê xo de estbîyayîşê awe bipawê, îdareyê awe yo aqilmend qebûl bikerê û neweraxebitnayîşê awa lêmine zî bîyarê ca. Ma sey Şaredarîya Şaristanê Girdî, roja ke ma ameyî îdareyî, a roje ra nat, vîzyonê ‘Şaristano Ekolojîk, Demokratîk û Azadîwazê Cinîyan’ kerdo merkez. Wezîfeyê ma yo tarîxî, vera polîtîkayanê rantî û betonkerdişî pawitişê na hemsengîya ekolojîke ya kehen o.”

‘Krîzê îklîmî grûbanê hesasan ser o hîna zaf tesîr keno’

Bucak ard vîrî ke Mudirîya Pêroyî ya DÎSKÎ warê Tesîsê Awguznayîşê Awa Şimitişî yê Merkezî de, bi sermîyangozarîyêka teqrîben 1 mîlyar lîrayan Tesîsê Awguznayîşê Awa Şimitişî yê Qonaxa 2. awan kena. Goreyê Bucak, badê temambîyayîşê tesîsî kapasîteya rojane ya awguznayîşê awa şimitişî ya şaristanî do 260 hezar metrekupan ra bireso 520 hezar metrekupan. No zêdebîyayîş do sîstemî vera barê ziwayîye û şaristanbîyayîşî hîna qewetin bikero.

Bucak wina dewam kerd: “Ma polîtîkayanê xo yê şaristanî çiqas bi dîqet awan bikerê zî, rastîya vurîyayîşê îklîmî yê globalî zî bi heme xirabkerîya xo verê ma de vinderta. Amed, ê cografyayan ra yew a ke ziwayîye tewr giran hîs kena. Seba projeyanê pêameyîşê îklîmî hemkarîya herêmkî, neteweyî û globale zî lazim a. Krîzê îklîmî her kesî rê eynî tesîr nêkeno; ziwayî û kêmîya awe tewr zaf feqîranê şaristanan, citekaranê qijan, cinîyan û komanê hesasan ser o tesîr kena. Coka îdareyê awe seba ma tena xizmetêkê teknîkî yê binawanî nîyo; meseleyê ‘Edaletê Awe’ û ‘Heqê Şaristanî’ yo.”

Bucak dîyar kerd ke netîce û pêşnîyazê zanistî yê konferansî do rayîrê îdareyanê herêmkîyan roşn bikerê. Bucak Unîversîteya Dîcle, zanyaran û mêmananê welatanê teberî rê sipas kerd.

Çarnayox: Mehmet Olmez