Hemşaredara Şaredarîya Amedî ya Şaristanê Girdî Serra Bucak ke Antalya de çalakîya çarçewaya COP31î de qisey kerd, bale ante ser o ke ganî îdareyê herêmkî dîyarkerdişê polîtîkayanê îklîmî û vilakerdişê çimeyan de bibê wayîrê vatişî. Hemşaredare Bucak veng da ke kapasîteyê tatbîqî yê îdareyanê herêmkîyan bêro xurtkerdiş û goş bidîyo Zîrweyê Şaran ê Îklîmî ke do 14ê teşrîna peyêne de şaristanî de dest pêbikero.

Hemşaredare Serra Bucak, çarçewaya Konferansê Hetan ê 31. (COP31) yê Peymana Çarçewa ya Vurîyayîşê Îklîmî ya Neteweyanê Yewbîyayeyan de ke Antalya de yeno organîzekerdiş, beşdarê çalakîya Yewîya Şaredarîyan a Tirkîya (TBB) bîye. Çalakîye de hewteyê verênî yê muzakereyanê COP31î ame erjnayîş û Belgeya Pozîsyonî ya COP31î ya TBB'yî ameye pêşkêşkerdiş.

Tesîrê krîzê îklîmî şaristan û dewan de yeno hîskerdiş

Bucak va ke tesîrê vurîyayîşê îklîmî tewr şênber şaristan, taxe û dewan de yeno hîskerdiş coka ganî rolê şaredarîyan newe ra bêro tarîfkerdiş û seba çareyanê herêmkîyan xerîtayêka rayîrî bêra xêzkerdiş. Bucak îfade kerd ke ziwayî, germîya zêdîye, tedaya çimeyanê awe ser o û krîzê citkarî û xidayî nawnenê ke polîtîkayê îklîmî raştîyanê herêmkîyan ra cîya nêeşkenê bêrê qiseykerdiş.

‘Ganî mabênê selahîyet, berpirsîyarî û fînansmanî de hemsengî bêro ronayîş’

Bucak dîyar kerd ke Tirkîya de dîyarkerdişê polîtîkayanê îklîmî û vilakerdişê çimeyan de vengê îdareyanê herêmkîyan têra nêyeno eşnawitiş û va: “Ganî kapasîteyê tatbîqî yê îdareyanê herêmkîyan bêro xurtkerdiş û mabênê selahîyet, berpirsîyarî û fînansmanî de hemsengî bêro ronayîş. Ganî resayîşê şaredarîyan ê fînansmanê îklîmî yê mîyanneteweyî bêro asankerdiş û doneyê ke herêm de yenê berhemardiş bêrê entegrekerdiş bi polîtîkayanê îklîmî yê neteweyîyan.” Bucak va ke îdareyê herêmkî panc serran de rey yenê weçînayîş la seba randevuyê wezaretî 2,5 serrî pawenê.

Seba edaletê îklîmî dîplomasîya komelî

Bucak va: “Ma bawer kenê ke îdarekerdişê îklîmî ganî tena mabênê dezgehan de ney, mabênê komelan de bi dîplomasîya komelî bêro ramitiş. Ganî cinî, ciwanî, citkarî û grûbê ke krîzê îklîmî ra tewr zaf zerar vînenê nê prosesî de bibê wayîrê vatişî ke ma bieşkê edaletê îklîmî ra qisey bikerê.”

‘Şarê ke berpirsîyarê na xerabîye nîyê zî, bedel danê’

Bucak ard vîrî ke welatê sanayî û grûbê sermîyanî berpirsîyarîya xo ra remenê la feqîr, kedkar, cinî û şarê cayî netîceyanê krîzî yê giranan ancenê û va: “Krîzê îklîmî eynî wext de problemêkê sinif, îstîsmar, edalet û aştî yo. Çareyê krîzê îklîmî mekanîzmayanê bazarî de ney, awankerdişê cuyêka demokratîk, seypêyîwaz û ekolojîke de yo ke xoza reyde pêameye ya û hewceyîyanê komelkîyan esas gêna.”

Bucak veng da ke goş bidîyo Zîrweyê Şaran ê Îklîmî (Zîrweyo Alternatîf) ke do mabênê 14-18ê teşrîna peyêne de Antalya de Salona Kongreyî ya Mîmar Sînanî de bêro organîzekerdiş.

Açarnayox: Mehmet Olmez