Hemşaredare Bucak ke weşî, werdiş û serûberê padokî yê 480 ganîyanê tesîsî cayê xo de kontrol kerdî, waşt ke xizmetê miqateyî yê ke yenê ramitiş û xebatê viraştişî yê ke dewam kenê, bi hesasî bêrê domkerdiş.

Hemşaredara Şaredarîya Amedî ya Şaristanê Girdî Serra Bucak, Warê Cuya Xoza de ke warêko 195 donimî ser o ame awankerdiş û wexto ke temam bibo do mêmandarîya teqrîben 15 hezar heywanan bikero, etud kerd.

Şertê weşî û cuye yê kutikan cayê xo de ameyî etudkerdiş

Çarçewaya etudan de Hemşaredare Bucak ekîbanê pisporan reyde ke Serekîya Daîreya Karanê Baytarî de warî ra 7/24 wezîfedar ê, ameye têhet û derheqê rewşa weşîye ya pêroyîye û şertanê cuye yê ganîyanê warî de agahîya bidetaye girewte. Hekîmanê baytarî dîyar kerd ke 480 kutikê tesîsî roje de di rey bi mamaya teza yenê weyekerdiş û her wext resenê awa pake.

Hekîmanê baytarî yê wezîfedaran derheqê protokolanê miqate û tedawî de nê agahîyî pare kerdî: "Ma verê ganîyanê ma yê ke keyeyê miqateyî rê yenê ardiş, înan rê derzîna hare û parazîtanê zere-teberî kenê, çîpê înan danê piro. Badê muameleyanê xesilnayîşî heywanî yenê neqilkerdiş Warê Cuya Xoza. Bi serûber her 3 aşman de reyêk derzîna parazîtanê zere-teberî, serre de reyêk zî derzîne hare yena tekrarkerdiş. Wexto ke warî ra nêweşîyêka qije yan zî birîndarbîyayîşêk bibo, hekîmê ma yê warî ca de mudaxele kenê. Rewşanê cidîyan de yan zî normalan de ke operasyonê ortopedîkî wazenê, ma Unîversîteya Dîcle reyde hemkarî kenê û sewqê ci kenê."

Hemşaredare Bucak ke personelê ke warê cuye de wezîfe kenê zî goşdarî kerdî, waşt ke heqê cuye yê heme ganîyanê ke wezîfeyê Şaredarîya Şaristanê Girdî de yê, bi hesasî bêro pawitiş û xizmetê miqateyî bi hesasîyêka girde bêrê domkerdiş.

Waranê viraştişî de etud

Hemşaredare Bucak dima qismanê tesîsî de ke viraştişê ci dewam keno, gêraye û ekîbanê Serekîya Daîreya Karanê Fenî ra derheqê xebatanê binawanî û serûberkerdişê dorûverî de agahî girewte. Tesîsî de ke xebatê warî bi lez dewam kenê, plan beno ke heme prosesê viraştiş û serûberkerdişê dorûverî peynîya aşma teşrîna verêne de temam bibê û war bi temamî bêro amadekerdiş.

Etudan de Sekretero Pêroyî Serdar Bakiroglu, Hetkara Sekreterê Pêroyî Ozlem Tekîn û serekê daîreyanê têkilîdaran Hemşaredare Bucak reyde bîyî.