Hemşaredara Şaredarîya Amedî ya Şaristanê Girdî Serra Bucak, bi amancê ke proje û xizmetanê ke seranserê şaristanî de yenê bicaardiş, cayê xo de etud bikera, zîyaretanê warî dewam kena. Hemşaredare Bucak na çarçewa de, qezaya Kayapinarî de viraştişê Merkezê Cuya Cinîyan ê Mehabadî ke do piştî bido averşîyayîşê cinîyan ê sosyal, kulturî û meslekî, û Parka Sanayî de etud kerd.

Dingo verên ê etudan Merkezê Cuya Cinîyan ê Mehabadî bî ke Taxa Firatî ya qezaya Kayapinarî de warêko 1105 metrekareyî de bingeyê ci ameyo eştiş û xebatê viraştişî dewam kenê. Merkezo ke bi amancê piştîdayîşê averşîyayîşê cinîyan ê sosyal, kulturî û meslekî ame bicaardiş, wexto ke temam bibo do paştî bido seypêyîya komelkî û xurtbîyayîşê cinîyan. Merkezê Cuya Cinîyan ê Mehabadî de ke sey kompleksêko sosyal ê zafamancî ame dîzaynkerdiş; kafeterya, odeya kayan a gedeyan, odeya perwerdekarî, odeya şêwirmendê psîkolojîkî, odeya koordînatorî, fuaye û warê nawitgehî, sînemaya hurdî, sinifa peykeran, sinifa fotografan, sinifa resiman, salona dansan û salona fitnessî do ca bigîrê.

Xebatê pakkerdişî do bêrê xurtkerdiş

Hemşaredare Bucak û êyê ke pîya bîyî, dima Parka Sanayî ya qezaya Kayapinarî zîyaret kerd û etud kerd. Demê zîyaretî de Hemşaredare Bucak hemwelatîyan reyde ke park de bîyî, ame têhet, waştiş û problemê înan goşdarî kerdî.

Hemşaredare Bucak seba hewanayîşê nebaşîyan ke hemwelatîyan antêne, yewînê têkilîdarî wezîfedar kerdî. Hemşaredare Bucak sewbîna dîyar kerd ke goreyê waştişanê şarê taxe, park û dorûverê ci de do xebatê pakkerdişî bêrê xurtkerdiş.

Keyeyê tenûre etud bî

Zîyaretê parke de Hemşaredare Bucak keyeyê tenûre zî ke viraştişê ci dewam keno û wexto ke temam bibo do bidîyo şarê taxe, cayê xo de etud kerd û derheqê xebatan de ke yenê ramitiş û detayanê projeyî de wezîfedaran ra agahî girewte.

Etudan de Hetkarê Sekreterê Pêroyî Zerîn Turk û Azîz Ozdogan û serekê daîreyanê têkilîdaran Hemşaredare Bucak reyde bîyî.