Şaredarîya Amedî ya Şaristanê Girdî, bi amancê xurtkerdişê binawanîya rayîran, dergkerdişê emrê bikarardişê rayîran û zêdekerdişê rehetîya resî, xebatanê xo dewam kena. Na çarçewa de Hemşaredare Serra Bucak, xebatê asfaltê germî ke hetê Serekîya Daîreya Viraştiş, Miqate û Tamîrê Rayîran ra Cadeyê Talaytepeyî ser o yenê ramitiş, etud kerdî.

Derheqê xebatan de agahî girewte

Hemşaredare Bucak warê xebate ra gêraye û wezîfedaran ra derheqê prosesê rokerdişê asfaltî û detayanê teknîkan ê tatbîqatî de agahî girewte. Bucak xebatê ekîban taqîb kerdî û dîyar kerd ke bernameyo ke bi amancê ke res hîna biemnîyet û rehet bibo ame destpêkerdiş, do goreyê planî bêro domkerdiş.

Xebatî Cadeyê Talaytepeyî ser o dewam kenê

Daraxo verên ê bernameyê asfaltî ke qezaya Kayapinarî de 6 cadeyan gêno xo mîyan, Cadeyê Leyla Qasimî ser o ameybî destpêkerdiş. Ekîbî goreyê bernameyî xebatanê xo Cadeyê Talaytepeyî ser o dewam kenê. Cadeyî de ke serawanîya rayîrî daraxê bînderî de ya, qatê werîyayîşî ke qato peyên ê serawanî yo, yeno rokerdiş.

Bi temambîyayîşê qatê werîyayîşî yeno amanckerdiş ke rîyê rayîrî vera trafîkê wesayîtan û şertanê îklîmî hîna xurt bibo, emrê bikarardişî derg bibo û rehetîya ramitişî zêde biba.

6 cadeyan ser o 42 hezar ton asfalto germ

Çarçewaya bernameyê xebate de do rayîrê bi pêroyî 7,7 kîlometreyî ser o ke cadeyanê Leyla Qasim, Talaytepe, Abdulkadîr Aksu, Jîyan, Baba Tahîr û Nazim Hîkmetî de virazîyeno, teqrîben 42 hezar ton asfalto germ bêro rokerdiş.

Şaredarîya Şaristanê Girdî, bi amancê ke hemwelatî herêman de ke binawanîya înan temam bîya, biresê rayîranê hîna biemnîyet, rehet û resayoxan, do xebatanê asfaltî seranserê şaristanî de dewam bikera.

Etudan de endamê meclîsî û serekê daîreyanê têkilîdaran Hemşaredare Bucak reyde bîyî.