Hemşaredara Şaredarîya Amedî ya Şaristanê Girdî Serra Bucak, beşdarê "Merasimê Xelatan ê Rojnamegeranê Serkewteyan ê Serre yê Tradîsyonelî yê 40." bîye ke hetê Cemîyetê Rojnamegeran ê Başûrê Rojhelatî (GGC) ra bi amancê teşwîqkerdişê rojnamegerîya biqalîte, daşinasnayîşê xebatanê serkewteyan û piştîdayîşê averşîyayîşê meslekî ame organîzekerdiş.

Merasim de ke otelêk de ame kerdiş, Hemşaredare Bucake ra teber Hemsereka Bajarî ya DEM Partî ya Amedî Gulşen Ozer, Hemverfeka Meclîsê DBB'yî Demet Ceylan û endamê meclîsî, hemşaredarê şaredarîyanê qezayan, parlamenterî, temsîlkarê partîyanê sîyasîyan û rêxistinanê komelê sivîlî û zaf endamê çapemenîye beşdar bîyî.

Tradîsyonê 40 serran ame pîrozkerdiş

Hemşaredare Serra Bucak ke merasim de qisey kerd, bale ante ser o ke Tirkîya prosesêko zehmet ra vîyarena û munaqeşeyê komelkî û sîyasî bi qutubbîyayîşan amade yê. Hemşaredare Bucake vat: "Welatêko winasî de muxalîf bîyayîş, muxalefet de ca girewtiş, pawitoxê heqan bîyayîş zaf zehmet o, la şahidîkerdişê nê heme têkoşînanê heqan, ca girewtişê kişta heqdarî de û cehdkerdiş ke agahîya raşte bireso komelî, seba rojnamegeran wezîfeyêko zehmet la hende zî bikeyf, biheyecan û pîroz o. Zaf tay welatan de demêko winasî ke hem hende zehmet hem zî hende muhîm o, ame ciwîyayîş. Ez wazena ewro tîya çinarê tradîsyonê çapemenîya azade, Mûsa Anterê biqîymetî bîyara xo vîrî. Meşte serrgêra mergê ci ya. 34 serrî vîyartî. Mûsa Anterî reyde zaf cînayetê rojnamegeran bênetîce û bêceza mendî. Cografyaya ma seba rojnamegeran cografyayêka zaf zehmet a. Ez wazena heme rojnamegeranê ke nê rayîrî de cuya xo ra bîyê, bîyara xo vîrî."

'Muzeyêka çapemenîye zaf layiqê nê şaristanî ya'

Hemşaredare Bucake rojnamegerê ke xelate girewtî, pîroz kerdî û dîyar kerd ke ê do dewam bikerê ke piştî bidê çapemenîya herêmkî û temsîlkaranê çapemenîya neteweyî ya herêmî. Hemşaredare Bucake vat "Muzeyêka çapemenîye zaf layiqê nê şaristanî ya" û dîyar kerd ke ê wazenê şaristanî rê muzeyêka çapemenîye dîyarî bikerê ke heme awanîyanê şaristanî reyde pîya do xîtabê herême zî bikera.

'Çapemenî de ziwanê haştî bi têkoşînê kedkaranê çapemenîye mumkun o'

Hemşaredare Bucake îfade kerd ke lingeyanê tewr muhîman ê Prosesê Haştî û Komelê Demokratîkî ra yew zî çapemenî ya û vat: "Çi heyf ke ma hîna zaf tay vînenê ke ziwanê a çapemenîye ver bi haştî vurîyeno. Çapemenî de ziwanê haştî tena bi têkoşînê kedkaranê çapemenîye mumkun o."

Xelate Zîlan Azad rê pêşkêş kerde

Hemşaredare Bucake xelata Zîlan Azad a Îlke TVyî ra ke xelata roportajî girewte, aye rê pêşkêş kerd.

Musabeqa de ke emser ya 40. ameye organîzekerdiş, zaf beşanê cîyayan de sey xebera nuştekî, xebera TVyî û roportajî xelatî wayîranê xo rê ameyî dayîş. Merasimî de serkewtişanê meslekîyan ra teber, name û dezgehanê ke hesasîyet û hişyarîya komelkî virazenê, înan rê zî xelatê taybetî ameyî pêşkêşkerdiş.

Badê pêşkêşkerdişê xelatan merasim bi fotografanê vîrardişî qedîya.

Çarnayox: Mehmet Olmez