Hemşaredara Şaredarîya Amedî ya Şaristanê Girdî Serra Bucak, Borsaya Heywanan de etudî kerdî û problem û talebê heywandaran cayê xo de goşdarî kerdî. Hemşaredare Bucake problemê binawanî etud kerdî ke verê cû warê girewteyî tede yê ke rîyê zerardîyayîşê erdlerzî ra mecbûr mendî ke bêrê rijnayene û dîyar kerd ke verê ke şertê zimistanî bibê giran, do tedbîrê demkîyî bêrê girewtene, seba tesîsê daîmî zî do payizî de dest bi prosesê îhale bêro kerdene.

Hemwelatîyan talebê xo îfade kerdî

Hemwelatîyan dîyar kerd ke hewceyîya verêne ya Borsaya Heywanan warê girewteyî ke şertê zimistanî munasîb ê û dîyar kerd ke rîyê awanîyan ra ke badê erdlerzî xebata xurtkerdişî tede ameybî kerdene la rîyê ke nêameyî xelaskerdene ameyî rijnayene, mexdûr bîyî. Hemwelatîyan ancî talebê xo yê derheqê awe û pakîye de îfade kerdî.

Tesîso daîmî do Buyuransu de bêro viraştene

Hemşaredare Bucake îfade kerd ke heta ke tesîso newe bêro akerdene, warê mewcûdî de do mudaxeleyo lezabez bêro kerdene û va ke do warê girewteyî yê demkî bêrê viraştene û xebatê miqate û tamîrî yê hewceyî bi lez bêrê kerdene. Hemşaredare Bucake dîyar kerd ke bi amancê ke Borsaya Heywanan rê çareserîya daîmî bêra temînkerdene, Taxa Buyuransuyî de ke girêdayeya qezaya Baglarî ya, tehsîsê cayî ameyo temamkerdene û qeyd kerd ke plankerdişo hewce do bêro kerdene û nê payizî de do bêro îhaleyî.

Ancî goreyê talebanê hemwelatîyan, seba ke xebatê miqate û tamîrî bieşkê bêrê kerdene, Borsaya Heywanan do hewteyo ameyox ra pey rojanê şeme û yewşemeyî de girewte bimana.

Etudanê Borsaya Heywanan de endamê meclîsî, Hetkarê Sekreterê Pêroyî yê DBByî Muhabbet Erdogmuş û Azîz Ozdogan û serekê daîreyanê têkilîdaran Hemşaredare Bucake reyde bîyî.