Festîvala Brîçî ya 2. qedîyaye ke hemkarîya Federasyonê Brîçî yê Tirkîya û Mudirîya Wîlayetî ya Ciwanîye û Sporî ya Amedî de ameye organîzekerdiş. Festîvale 23-25ê teşrîna verêne de Salona Sporî ya Seyrantepe de bîye û xelatê sporhesan ke derece girewte, bi merasîmêk ameyî dayîş. Şaredarîya Amedî ya Şaristanê Girdî hetê teknîkî ra piştî daye festîvale; Hemşaredare Serra Bucak û endamanê meclîsî zî festîvale de ca girewt.

Hemşaredare Bucake xelatê sporkaranê cinîyan dayî

Bucake merasîmî de xelatî dayî sporkaranê cinîyan ke derece girewte, keyfweşîya xo îfade kerde û vat: “Tîya de hewayêko zaf rind û taybetî est o. Mêmanê ma yê ke wîlayetanê bînan ra ameyî, zî beşdarê ma bîyî. Ez bi taybetî sporkaranê ma yê cinîyan pîroz kena ke bîyî yewin; înan rengêk, rindîyêk, aqil û kede arde tîya. Ez wazena ke şaristanê ma de zî camêrdî êdî vernîya cinîyan akerê û ma tîya de xelatan bidê sporkaranê ma yê cinîyan ê herêmkîyan zî. Ez herkesî rê sipas kena ke amê şaristanê ma û ma bi rûmet kerdî; ez heme sporkaranê ke xelatî girewtî, pîroz kena.”

Bernameyî de bi nameyê Şaredarîya Şaristanê Girdî Bucake rê plaketêk zî ame dayîş.