Hemşaredara Şaredarîya Amedî ya Şaristanê Girdî Serra Bucak hemwelatîyan reyde ame têhet ke qezaya Sûrî de vera projeyê Santralê Enerjîya Rojî (GES) xover danê. Bucake reaksîyon da ke şîrketî verê qediyayîşê prosesanê huqûqî dekewtî war û dîyar kerd ke do seba pawitişê warê cuye, çimeyanê debare û mîrasê şarî yê tarîxî xoverdayîş û piştîpêdayîşî dewam bikerê.

Endamê meclîsê DBB'yî, temsîlkarê rêxistinanê ekolojî û komelê sîvîlî û cinî, ciwan û gedeyê Taxa Arzoxlî (Kervanpinar) zî beşdarê zîyaretê piştîpêdayîşî bîyî. Bi pêşengîya Platformê Pawitişê Dewa Arzoxlî Cadeyê Sarilar ra heta warê santralî rayîrşîyayîşêko girseyî bî; pankartêk ame berzkerdiş ke tede nuştbî: “Bajarê Antîk ê Xirapî û dewa ma qurbanê sermîyanî mebê.” Cinîyan vat: “Ma nê projeyî tîya nêwazenê. Proje zerar dano warê cuya ma, heywananê ma û herra ma. Eke ma pîya têkoşîn bikerê ameyoxê xo xelesnenê.”

'Şîrketî bi zor û teda dekewenê nê warî'

Bucake vat: “Dewa Arzoxlî de cinî, ciwan, gedeyî û heme şarê ma bi aşman o ke xover danê. Prosesê huqûqî, raporê ÇEDî û etudê pisporan hema nêqediyayê, la şîrketê awankerdişî bi erebe û cendirmeyan yenê tîya. Warê ke wazenê panelê rojî tede ronê, nêzdîyê cayanê ronîştişî yo û warê mergeyî yo ke şar heywananê xo tede çêreno. Tîya herr, aw û malê herkesî yo hempar o.”

Hişyarîya koçberîya dîyine

Bucake dîyar kerd ke merdimanê ke 1990an ra nat dewa xo verdaya, na rey bi qirkerdişê ekolojîk wazenê koçberîyêka dîyine bidê ciwîyayîş û vat: “Ma raporanê ÇEDî nêşinasnenê ke bi kopy-past ameyî amadekerdiş.”

Vengdayîş seba warê sîtî yê arkeolojîkî

Bucake bale ante ser o ke raporanê pisporan de derheqê warê sîtî yê arkeolojîkî de hişyarî est a û vat: “Çira arkeologî, heyetê zanistî yê unîversîteyan yan zî Heyetê Pawitişê Mîrasê Kulturî nêyenê tîya û etud nêkenê? Ma do şarê xo reyde vera nê projeyî vindê û xoverdayîş û piştîpêdayîşî dewam bikerê.”

Hemwelatîyan zî reaksîyon da ke şîrketî bi kepçeyan kendiş kerd û mîrasê tarîxî yê warî zerar dî; venga wezaretanê eleqedaran da ke lez mudaxele bikerê.