Serekîya Daîreya Îtfaîya xebatanê mudaxeleyê şewatan kena. Doneyê serekîye yê aşmanê gulane, hezîrane, temmuze, tebaxe û êlule mojnenê ke mudaxeleyî bi taybetî aşmanê hamnanî de zêde bîyî. Nê hîrê tewiran ra şewatê vaş û simerî tewr zaf bîyî; dima şewatê firêzeyan û zîyanan ameyî.

Şewatê firêzeyan tewr zaf temmuze de bîyî

Ekîban gulane de mudaxeleyê 4, hezîrane de 141, temmuze de 522, tebaxe de 456 û êlule de 457 şewatanê firêzeyan kerd; bi pêroyî hezar û 580 şewatî. Temmuze, tebaxe û êlule de mudaxeleyê hezar û 435 şewatanê firêzeyan ame kerdiş; no teqrîben %91ê heme şewatanê firêzeyan o.

Şewatê zîyanan hezîrane de zêde bîyî

Ekîban mudaxeleyê bi pêroyî 204 şewatanê zîyanan kerd: gulane de şewatê zîyan çin bîyî, hezîrane de 131, temmuze de 61, tebaxe de 5 û êlule de 7. Hezîrane û temmuze de 192 şewatî bîyî; no parçeyo tewr gird ê na kategorî yo.

Mudaxeleyê şewatanê vaş û simerî 2 hezarî ra vîyartî

Mabênê gulane û êlule de mudaxeleyê 2 hezar û 3 şewatanê vaş û simerî ame kerdiş: gulane de 62, hezîrane de 490, temmuze de 569, tebaxe de 480 û êlule de 402. Na kategorî de zî hûmara tewr berze temmuze de bîye; tebaxe û êlule de hûmare kêmî bîye, la 400î ra ser mende.

Hîrê tewiran de bi pêroyî 3 hezar û 787 mudaxeleyî

Eke hîrê tewirê şewatan pîya bêrê nirxnayîş, ekîban gulane de mudaxeleyê 66, hezîrane de 762, temmuze de hezar û 152, tebaxe de 941 û êlule de 866 şewatan kerd. Hûmara mudaxeleyan temmuze de resaye seviyeya tewr berze; hûmara pêroyî zî 3 hezar û 787 bîye.

Tadayox: Mehmet Olmez