Çarçewaya bernameyî de ke mabênê tarîxanê 8-16ê êlula 2026î de ame kerdene, Amed ra heyetêk şî Hannover. Bernameyî de amadekarî û prowayê xebata sehneyî ya hempare dewam kenê ke do mabênê di şaristanan de bêra kerdene.

Mabênê dezgehanê muzîkî de hemparî do bêra averberdene

Çarçewaya projeyî de yeno plankerdene ke mabênê Dibistana Muzîkî ya Hannoverî, Konserwatuwarê Şaristanî yê Aram Tîgranî û Ma Muzîkî de warê perwerdeyê muzîk û xebatanê atolyeyan de parekerdişê tecrubeyan bêro zêdekerdene. Bi xebata sehneyî ya hempare do muzîsyen û dezgehê muzîkî yê di şaristanan bêrê têhet û berhemêko hempar bîyarê meydan.

Warê kultur û hunerî de parekerdişê tecrubeyan

Heyetê Amedî ke hetê Hetkara Sereka Şaredarîya Hannoverî Monîca Plate ra ame pêşwazîkerdene, çarçewaya zîyaretî de cayê kulturî û tarîxî yê şaristanî ra zî gêrayî. Qiseykerdişan de averberdişê têkilîyanê kulturîyan ê mabênê di şaristanan, cîyakerdişê xebatanê hemparan ê warê muzîkî û zêdekerdişê parekerdişê tecrubeyan qisey bîyî.

Plate memnûnîya xo ya hemparîya kulturî ya mabênê Amed û Hannoverî îfade kerd û piştîdayîşê xo îfade kerd ke ameyoxî de mabênê di şaristanan de hîna zaf xebatê hemparî bêrê kerdene.

Berhemardişo hempar û hemparîya daîmî yenê amanckerdene

Bi Projeyê Hemparîya Kulturî yeno amanckerdene ke mabênê Amed û Hannoverî de, verê cû muzîk, waranê kultur û hunerî de îmkanê musayîşî, parekerdişê tecrubeyan û berhemardişê hemparî bêrê averberdene û xebatê ke do bêrê ramitene, hemparîyanê daîmîyan rê zemîn amade bikerê û piştî bidê xurtkerdişê girêdayîşanê kulturîyan ê mabênê di şaristanan.