Mabênê neslan de pirdê zerrî: Gedeyan Keyeyê Pîran zîyaret kerd
Gedeyê ke Zarokîstan û Keyeyê Miqateyê Rojaneyî yê Baxcilaran û odayanê kayan ê gedeyan ê Warê Cuya Hempare yê Sumerparkî ra îstîfade kenê, Keyeyê Pîran de hemwelatîyanê pîran reyde ameyî têhet. Zîyaretî de ke amanc kerd piştîpêdayîşê mabênê neslan xurt bikero, gedeyan hemwelatîyan rê gulî dayî û înan reyde pîya deyîrî vatî.
Şaredarîya Amedî ya Şaristanê Girdî gede û hemwelatîyê pîrî ardî têhet ke piştîpêdayîşê mabênê neslan xurt bibo û hişyarîya berpirsîyarîya komelkî ya gedeyan aver şêro. Çalakîye bi xebata hempare ya Mudirîya Şûbeyê Xizmetanê Gedeyan a Serekîya Daîreya Xizmetanê Komelkî û Mudirîya Şûbeyê Xizmetanê Pîran a Serekîya Daîreya Xizmetanê Astengdar û Pîran ameye kerdiş.
Gedeyan hemwelatîyan reyde qisey kerd
Gedeyan zîyaretê Keyeyê Pîran de hemwelatîyan reyde qisey kerd û pîya wext vîyarna. Pêdîyayîşî de ke heskerdiş, hurmet û parekerdiş tede vernî de bî, mabênê neslanê cîyayan de têkilî ronîya.
Pêdîyayîşêko hîsî û bi gulan
Zîyaretî de gedeyan hemwelatîyanê Keyeyê Pîran rê gulî dayî. Hemwelatîyanê ke gulê gedeyan girewtî, hîsdar bîyî. Gede û hemwelatîyanê pîran hîsê heskerdiş û piştîpêdayîşî yewbînan reyde pare kerd.
Kilamî ameyî vatiş
Pêdîyayîşî de hemwelatîyanê Keyeyê Pîran kilamî vatî ke kulturê fekkî yê kurdan de cayêkê înan o muhîm est o. Gedeyan zî înan reyde vat. Çalakîye de ke gedeyan rê firsend da ke hemwelatîyanê pîran reyde têkilî ronê, têkilîya mabênê neslan û parekerdişê nirxanê kulturîyan vernî de bî.
Çarnayox: Mehmet Olmez
