Semînerî de ke Şaredarîya Amedî ya Şaristanê Girdî Merkezê Cuya Cinîyan ê Koşuyolu de organîze kerd, derheqê muhîmîya teşxîsê rewî, tagêrayîş û kontrolanê doktoran û babetê kanserê memikan û metodanê tedawî de qisey bî.

Şaredarîya Şaristanê Girdî bi minasebetê “Aşma Hişyarîya Kanserê Memikan” merkezê şaristanî û qezayan de skrînîngê weşîye û perwerdeyê pratîkî aşme de dewam kerdî. Xebatan de ke bi pêşengîya Serekîya Daîreya Polîtîkayanê Cinîyan ameyî ramitiş, amanc bî ke bi perspektîfê seypêyîya cinsîyetê komelkî resayîşê cinîyan ê heqê weşîye asan bibo. Na çarçewa de şeş qezayan û zaf taxan de bi beşdarîya zafe ya cinîyan çalakîyê cîya-cîyayî ameyî organîzekerdiş.

Muhîmîya teşxîsê rewî û skrînîngan ame qalîkerdiş

Çalakîya peyêne ya xebatan Merkezê Cuya Cinîyan ê Koşuyolu de bîye. Radyologa Memikan Uzman Dr. Derya Denîz Altintaş semînerî de dîyar kerd ke elemanê bingeyinî yê ke rayîrê tedawî dîyar kenê, radyologê memikan û teşxîsê rewî yê. Altintaşe vat: “Teşxîsê rewî no yo ke kitle hema bi dest nêameyo hîskerdiş û ame tesbîtkerdiş. Muayeneyê xo bi destê xo zaf biqîymet o, la tayê rey eşkeno ke ma ereyî bimanê. Muhîm o ke ma şêrê kontrolan û skrînîngan bikerê.”

Dej tena xo sere krîter nîyo

Altintaşe dîyar kerd ke vateyê “Eke dej est o, problem çin o” ke mîyanê şarî de vila yo, şaş o û dej tena xo sere krîter nîyo. Altintaşe bale ante ser o ke kesê ke keyeyê înan de hîkayeyê kanserî est o û kesê ke 40 serran ra pîlêr ê, ganî heme şêrê kontrolê doktorî; ard ziwan ke kanserê memikan babetê cîya-cîyayî yê û metodê tedawî zî goreyê nê babetan bedilîyenê.

Badê pêşkêşîye cinîyan derheqê babetanê nê warî, tecrubeyanê xo yê weşîye û tedbîranê ke ganî bêrê girewtiş de persê xo persayî.