Taxanê Akçorten û Bîrcemalî de hewceyîya awe ya 48 hezar û 500 heywanan ameye temînkerdene û 130 donim erdê citkarîye resa awe; Orenkuyu de zî newekerdişê goleka ke do 50 hezar heywanan û 250 donim warê ramiteyî rê xizmet bikera, dest pêkerd.

Serekîya Daîreya Xizmetanê Dewan, bi amancê domdarîya heywandarîye û berhemardişê citkarîye yê taxanê dewan, golekan de xebatanê miqate, tamîr û newekerdişî ramena. Ekîbê mudaxeleyê lezabezî yê Serekîya Daîre, çimeyanê awe ke rîyê varanê zafî, laser û deformasyonan ra bêkar mendbî, yew bi yew newe ra kenê fonksîyonel. Nê demî de ke tesîrê krîzê îklîmî û talûkeyê ziwayîye hîna zaf yenê hîskerdene, yeno amanckerdene ke herra bibereket û merga hîraye ya Çêrmûgî bigêrîyê binê emnîyetî.

Akçorten û Bîrcemal de golekî newe bîyî

Taxa Akçortenî de goleka HÎSî ke hewceyîya awe ya 40 hezar û 500 heywanan temîn kena, ameye tamîrkerdene û bi kapasîteya xo ya temame newe ra dekewt falîyet. Taxa Bîrcemalî de zî goleka ke teqrîben 8 hezar heywanan rê awe temîn kena û 130 donim erdê citkarîye resnena awe, ameye newekerdene. Bi no hewa do bêro temînkerdene ke hemwelatîyê ke taxan de heywandarîye kenê, bi taybetî demanê ziwayan de hîna biserûber biresê awe.

Orenkuyu de 50 hezar heywanî do fayda bigîrê

Ekîban Taxa Orenkuyuyî de zî dest bi xebatanê newekerdişê goleke kerd. Goleka ke do taxanê dorûverî reyde pîya hewceyîya awe ya teqrîben 50 hezar heywanan û 250 donim warê ramiteyî temîn bikera, do newe ra bi kapasîteya xo ya temame bêro xebitnayene. Seba ke awa qilêre ya taxe têmîyanê awa goleke nêbo, do kanalêko teqrîben 200 metre derg zî bêro viraştene. Çarçewaya projeyî de golekê taxanê Bayat, Yaylacik, Çalitepe û Kuyuyî zî kewtî bernameyê xebate.

'Eke na awe nêbo heywanê ma bêawîye ra mirenê'

Muxtarê Taxa Orenkuyuyî Sadik Aslanî, Şaredarîya Şaristanê Girdî rê sipas kerd û va: "Dewa ma 130 keyeyî ya, ma heywandarîye kenê. Dewa ma de teqrîben 45 hezar heywanê hurdî û 2 hezar heywanê girdî est ê. Eke na awe nêbo heywanê ma bêawîye ra mirenê, ma zî nêeşkenê heywandarîye bikerê. Homa şaredarîye ra razî bo."

Serekê Yewîya Şitî ya Çêrmûgî Ramazan Aslanî zî va: "Dewanê dorûverî ra zî hemwelatî heywananê xo anê tîya. Eke nê golekî nêbê, heywanê ke nê wextan de Erzirom ra yenê, bêawîye ra telef benê. Herêma ma heywandarîye ra teber bi karêko bîn eleqedar nêbena, coka nê golekî seba ma gan ê."

Dewij Ramazan Kiliçî zî va: "Pêroyê çimeyê debara ma bi na goleke girêdaye yo. Verê rîyê awanê kanalîzasyonî ra tayê heywanê ma telef bîbî, nika şaredarîye seba ci kanalêk virazena." Kiliçî îfade kerd ke bendî do 2 metreyî bêrê berzkerdene û golek do hîna zaf awe bigîro.

47 cayan de piştîdayîş

Bi 47 projeyanê rehabîlîtasyonê golekan ke seranserê şaristanî de ameyî dîyarkerdene, zêdekerdişê berhemdarîya citkarîye, temînkerdişê awa şimitişî ya heywanan û kêmîkerdişê mesrefanê heywanpawitoxan yeno amanckerdene.