Seba ameyoxê mîrasê dengbêjîye kombîyayîşo hempar
Hemşaredara Şaredarîya Amedî ya Şaristanê Girdî Serra Bucak, Keyeyê Dengbêjan de dengbêjan reyde ameye têhet û taleb û teklîfê seba neqilkerdişê edebîyatê fekkî yê kurdan û mîrasê kulturî yê ameyoxî goşdarî kerdî. Kombîyayîşî de gamanê seba pawitişê mîrasê kulturî ra teber, derheqê serûberkerdişê şertanê xebate yê dengbêjan de zî agahî ameye dayene.
Serekîya Daîreya Kultur, Huner û Karanê Komelkîyan, Keyeyê Dengbêjan de ke Taxa Zîya Gokalpî ya qezaya Sûrî de yo, dengbêjan reyde ameye têhet ke binê banê DBByî de falîyet ramenê. Kombîyayîşî de Hemşaredara Şaredarîya Şaristanê Girdî Serra Bucak, Hetkara Sekreterê Pêroyî Muhabbet Erdogmuş, Hemverfeka Meclîsê DBByî Demet Ceylan, Sereka Daîreya Kultur, Huner û Karanê Komelkîyan Zeynep Yaş, endamê Komîsyona Kulturî ya Meclîsî û zaf dengbêjî beşdar bîyî.
Statuyê hunermendî ame dayene
Ame dîyarkerdene ke dengbêjê ke verê binê banê şaredarîye de bi hewayo zerrîwaz xizmet dayêne, nika ra dima do xizmetanê xo bi statuyê hunermendî dewam bikerê.
Hemşaredare Serra Bucak ke kombîyayîşî de qisey kerd, îfade kerd ke înan 24 dengbêjan reyde peyman îmza kerdo û çarçewaya xebate dîyar kerda û vat: "Ewro ma do pîya sohbet bikerê. Ez zaf şa ya ke şima ameyî, weş bê. Şima dengbêjê nê şaristanê kehenî yê û seba ma zaf biqîymet ê. Şima nê hunerê kehenî dewam kenê. Hêvîdar a ke demê ameyoxî de hûmara ciwananê dengbêjan zî zêde bibo."
Sereka Daîreya Kultur, Huner û Karanê Komelkîyan Zeynep Yaş zî bal ante muhîmîya tarîxî û kulturî ya dengbêjîye ser o û vat: "Nika binê banê ma de 24 dengbêjî ca gênê. Ma wazenê ke na hûmare her şaristan û qeza de hîna zêde bibo. Ma ameyî têhet ke qedr û qîymetê dengbêjanê xo bizanê û nê mîrasê kehenî biresnê cayêk ke heqê ci yo."
'Hewceyîya ma bi ciwananê dengbêjan est a'
Dengbêjan ke kombîyayîşî de qisey kerd, memnûnî û şayîya xo ya pîyabîyayîşî ard ziwan. Dengbêjan dîyar kerd ke hewceyîya ciwananê dengbêjan est a û ard ziwan ke do xebatanê xo yê nika ra dima nê hetî ser o dewam bikerê.
