Seba vîrardişê 16 cinîyanê ke Amed de ameyî kiştiş, şitilî ronîyayî
Şaredarîya Amedî ya Şaristanê Girdî, çalakîya çarçewaya 25ê Teşrîna Peyêne de ke Parka Aştî de ameye organîzekerdiş, seba vîrardişê 16 cinîyanê ke serra 2026î de şaristanî de ameyî kiştiş, şitilî ronayî. Hemşaredare Serra Bucak dîyar kerd ke têkoşînê seba dinyayêka bêşîdete do dewam bikero.
Meclîsê Cinîyan ê Şaredarîya Amedî ya Şaristanê Girdî û Serekîya Daîreya Polîtîkayanê Cinîyan, çarçewaya 25ê Teşrîna Peyêne Roja Têkoşînê Şîdetî yê Vera Cinîyan a Mîyanneteweyî de çalakîya ronayîşê şitilan organîze kerde.
Çalakîye ke çarçewaya bernameyanê bi şîarê “Vera şîdetî pê têkoşînê rêxistinkerdeyî nika wextê cinîyan o” de ameye organîzekerdiş, Parka Aştî ya semtê Seyrantepeyî de ameye kerdiş. Çalakîye de ke bi amancê baleantişê şîdetê vera cinîyan ser o û girdkerdişê piştîpêdayîşê cinîyan ameye kerdiş, seba vîrardişê 16 cinîyanê ke serra 2026î de Amed de ameyî kiştiş, şitilî ronîyayî.
‘Dinyayêka bêşîdet, bêîstîsmar û bêcîyakarî’
Hemşaredara Şaredarîya Amedî ya Şaristanê Girdî Serra Bucak ke çalakîye de qisey kerd, ard vîrî ke par zî seba vîrardişê cinîyanê ke ameyî kiştiş şitilî ronaybî û wina va: “Par zî çi heyf ke ma seba vîrardişê cinîyanê ke ameyî kiştiş bi şîarê ‘Darê ke ma ronayî pîl bibê, bibê wesîleyê dinyayêka bêşîdet, bêîstîsmar û bêcîyakarî’ şitilî ronaybî. Ewro zî ma do seba vîrardişê 16 cinîyanê ke serra 2026î de ameyî kiştiş şitilan ronê. Ma zanê ke hûmarê fermî zaf zêdeyêr ê. Ewro ma reyna Parka Aştî de 16 şitilan ronanê.”
Têkoşînê vera şîdetê cinîyan
Bucak ke bale ante ser o ke xebatê têkoşînê vera şîdetê cinîyan do dewam bikerê, qiseykerdişê xo wina qedêna: “Xebatê ma yê têkoşînê vera şîdetê cinîyan do dewam bikerê heta ke ma biresê dinyayêk ke tede kiştiş û qirkerdiş çin bo. Destê herkesî weş bo.”
