Mudirîya Pêroyî ya Îdareyê Awe û Kanalîzasyonê Amedî (DÎSKÎ), seba newekerdişê xeta awa şimitişî ya nikayîne ke Taxa Palûkê de têdima xirabe bena, xebate daye destpêkerdiş. Plan beno ke xebate ke hetê Mudirîya Şûbeyê Sermîyangozarî û Viraştişî ra yena ramitiş, 10 rojan de temam bibo.

Xirabî û teqayîşê boruyanê xeta ke teqrîben 15 serrî verê ameybî ronayîş, bîyî sebebê temînnêkerdişê awe yê taxe. Badê etudanê teknîkan ke hetê DÎSKÎ ra ameyî kerdiş, qerar ame dayîş ke xete bêra newekerdiş. Pê xebate yeno amanckerdiş ke têdimayîya xirabîyan bêra kêmîkerdiş, domdarîya temînkerdişê awe bêra xurtkerdiş û teqrîben 200 keyeyî hîna biemnîyet biresê şebekeyî.

Kuçeyanê tengan de xebata bikontrole

Rîyê awanîya kuçeyanê taxe yê tengan ra, kendiş û ronayîşê boruyan goreyê şertanê warî yenê kerdiş. Ekîbî awanîyê binawanî yê nikayînî û şertê resî yê rayîrê xebate gênê çiman ver û newekerdişê xete game bi game ramenê.

Pê xeta newîye, yeno texmînkerdiş ke talûkeyê xirabîye ke boruyanê kehenan ra vejîyenê, kêmî bibê û hewceyîya mudaxeleyî bêra kêmîkerdiş. Bi no hewa yeno amanckerdiş ke emnîyetê şebekeyê awa şimitişî bêro zêdekerdiş û hermîyayîşê serawanîya rayîrî ke rîyê xirabîyan ra virazîyeno, bêro sînordarkerdiş.

Îdareyê awe yo demderg

Mihendîsê Kontrolê Projeyî Îbrahîm Okanî dîyar kerd ke erjnayîşê rewşa nikayîne ya xetanê awa şimitişî goreyê daneyanê warî û hewceyîyan, peymanê îdareyê awe ra yew o. Okanî vat:

"Îdareyê awe de fehmê ma yo bingeyin o yo ke mudaxelekerdişê xirabîye ra tepîya, rewşa şebeke ya demê ameyoxî zî bêra erjnayîş. Wexto ke ma emrê binawanî, tarîxê xirabîyan û nufusî pîya erjnenê, ma eşkenê qeraranê newekerdişî hîna raşt bidê. Xebata Taxa Palûkê zî parçeyê fehmê îdareyê demdergî yo ke tede çimeyî bi berhemdarî yenê bikarardiş û vindîbîyayîşê awe û talûkeyî yenê kêmîkerdiş."

Xirabîyanê xeta kehene tesîrê cuye kerdêne

Adîl Efe ke teqrîben 50 serrî yo Taxa Palûkê de ciwîyeno, dîyar kerd ke xirabîyanê xeta kehene bi demêko derg tesîrê cuya taxe kerdêne. Efeyî wina vat:

"Xeta kehene teqrîben 15 serrî verê ameybî viraştiş. Demanê peyênan de vera-vera xirabî û teqayîşê awe bîyêne. Şarê taxe na rewşe ra tesîr girewtêne. Teqrîben 200-300 keyeyî û hezar kesan ra zafêr kesî do xeta newîye ra feyde bigîrê. Ma seba na xebate Şaredarîya Şaristanê Girdî û DÎSKÎ rê sipas kenê."

Sami Acet ke şarê taxe ra yo, ey zî vat ke xirabîyanê boruyan temînkerdişê awe ra teber, rewşa fîzîkîye ya kuçeyan ser o zî tesîr kerdêne. Acetî wina vat:

"Seba ke xete kehen bîye têdima teqayêne. Awe birnîyayêne, kerrayê parke zerar dîyêne û kuçeyan de çalî virazîyayêne. Ma embazanê xo û muxtarê xo reyde pîya muracat kerd. DÎSKÎ waştişê ma erjna û seba newekerdişê xete xebate daye destpêkerdiş. Êyê ke keda xo tede est a, înan rê sipas kenê."