Têgêrayîşê Cinîyanê Azadan (TJA) bi sloganê “Bi Hêz û Îradeyê Xo Nika Demê Cinîyan O” destpêkê çalakî û falîyetanê 25ê Teşrîna Peyêne Sumerpark de da. Hemşaredara Şaredarîya Şaristanê Girdî Serra Bucak, Hemsereka Şaristanî ya DEM Partî ya Amedî Fatime Uzul Levent, Hemserekê Şaristanî yê DBPyî Ruçem Vefa Elyakut û Ahmet Dogan, parlamenterê DEM Partî, endamê meclîsê DBB'yî, hemşaredarê qezayan û temsîlkaranê rêxistinanê cinîyan çalakîye de ca girewt.

'Rêxistinbîyayîş û çalakî gandar verdanê'

Aktîvîsta TJA Rengin Sarsarkan eşkerayîye de venga cinîyan da ke beşdarê çalakîyan bibê û vat: “Ma do bi atolye, kombîyayîşê cinîyan û xebatanê hişyarîye veng û vateyê cinîyan pîl bikerê û piştîpêdayîşî xurt bikerê. Ma vanê: Tenayî û bêvengî kişena; rêxistinbîyayîş û çalakî gandar verdanê.”

Hemşaredare Bucak: Ma do qet yew cinî zî tena nêverdê

Bucake dîyar kerd ke wexto ke têkoşînê cinîyan pîl beno, îqtîdar zî bi heme hêzê xo xebitîyeno ke camêrdîye dezgehî bikero; ganî cinî piştî bidê pê û seba têkoşînê vera şîdetî kampanyayan biramê. Bucake ard ziwan ke sey îdareyanê herêmkîyan û heme dînamîkanê şaristanî do qet yew cinî zî tena nêverdê.

Bucake vat ke na cografya de cinî serran bi serran hem sebebê nasnameyê kurdîye hem zî nasnameyê cinîye ra di rey rastê polîtîkayanê asîmîlasyon, tersnayîş û hêrişan ameyî û vat: “Ma bawer kenê ke têkoşînê cinîyan ê rêxistinbîyayeyî na cografya de do rojêk şîdetê vera cinîyan vindarno, qet nêbo kêmî bikero.”

Vengdayîşê 25ê Teşrîna Peyêne

Bucake vat: “Taxan, kuçeyan, unîversîteyan, waranê pêroyîyan, cayanê karan û şaredarîyan de ma hewceyê şima yê ke derheqê polîtîkaya şîdetê vera cinîyan de qisey bikerê, bêrê têhet û pişta xo bidê pê. Ma venga şima danê ke heme bernameyanê na 25ê Teşrîna Peyêne de îdareyanê herêmkîyan û têgêrayîşê cinîyan reyde bibê.” Bucake dîyar kerd ke cinî tena nîyê û eşkenê muracatê keyeyanê piştîpêdayîşê cinîyan bikerê.

Badê qiseykerdişan Bucake û cinîyan rayîr şîyî cayê ke Sultan Kara 26ê tebaxe de tede ameye kiştiş û uca de qerenfîlî ronayî.