Çalakîyê bernameyî ke hetê Serekîya Daîreya Polîtîkayanê Cinîyan ra bi şîarê “Vera şîdetî pê têkoşînê rêxistinkerdeyî nika wextê cinîyan o” ame amadekerdiş, dewam kenê. Na çarçewa de bi amancê xurtkerdişê piştîpêdayîşê cinîyan û awankerdişê hişyarîya vera şîdetî, Grûba Bisîkletan a Cinîyanê Amedî reyde turê bisîkletan ame vistiş.

‘Ma dawet kenê ke şîdetî rê vajîyo “bes”’

Sereka Daîreya Polîtîkayanê Cinîyan Ozdene Gurbuz Sumer ke verê turî Parka Koşuyolu de eşkerayî daye, dîyar kerd ke ê amanc kenê torra têkoşînê vera şîdetî û piştîpêdayîşî aver berê û vera qirkerdişanê cinîyan ke zêdîyenê venga herkesî da ke têkoşînêko hempar bikerê. Sumere ke bale ante ser o ke ê do pedalan seba cuyêka bêşîdet, azad û seypêye biçarnê, va: “Ma ewro reyna pedalanê xo çarnenê ke vera şîdetê ke zêdîyeno heme waranê komelî, tena cinîyan ney pêroyê şarê xo dawet bikerê ke têkoşînê vera şîdetî de ma rê piştî bidê û şîdetî rê vajê ‘bes o’.”

Badê eşkerayî cinîyan bi tilîlî û sloganan heta Meydanê Berê Koyî pedal çarna. Çalakîye de mesajê girdkerdişê piştîpêdayîş û têkoşînê hemparî yê vera şîdetê cinîyan ameyî dayîş.