Serekîya Daîreya Karanê Afatan û Îdareyê Rîskî bi minasebetê Roja Kêmîkerdişê Rîskanê Afatan a Dinya, Mektebê Verênî yê Bajarê Neweyî de perwerdeyê afetan organîze kerd. Bernameyî de ke wendekar û mamosteyan tede ca girewt, perwerdeyê şewate û hişyarîya afetan ame dayîş û tatbîqatê erdlerzî ame kerdiş.

Wendekaran rê derheqê têkoşînê vera afetan, çîyê ke wextê erdlerzî de ganî bêrê kerdiş, vengkerdişê lezabezî û mudaxeleyê verênî yê şewate de bi pratîkî agahî ameye dayîş. Perwerdeyî ra pey bi vengê sîrenan mamoste û wendekaran sinifî biemnîyet veng kerdî û baxçeyê mektebî de ameyî pêser. Uca de înan rê bi tupê adirî ame mojnayîş ke mudaxeleyê şewatan senî beno.

Bale ancîya muhîmîya hişyarîye ser o

Perwerdeyî de bale ancîya ser o ke amadebîyayîşê vera afetan û hereketê raştî yê wextê afetî seba kêmîkerdişê vindîbîyayîşê ganan û zerarê madî zaf muhîm ê. Pê perwerdeyanê hişyarî yeno amanckerdiş ke hemwelatî derheqê ê çîyan de ke ganî verê, wextê û pey afetan bêrê kerdiş, hişyar bibê û amadebîyayîşê înan vera rewşanê lezabezan zêde bibo.

Serekê Daîreya Karanê Afetan û Îdareyê Rîskî Azad Yildiz zî beşdarê perwerdeyan bî. Perwerdeyan ra pey mamoste û wendekaran rê broşurî ameyî vilakerdiş ke tede derheqê hişyarîya afetan de agahî est ê.

Perwerdeyî do mektebanê bînan de zî dewam bikerê

Perwerdeyê hişyarîya afetan çarçewaya protokolê Mudirîya Perwerdeyê Neteweyî de yenê dayîş û do rojanê ameyoxan de mektebanê cîyayan de zî dewam bikerê. Şaredarîya Şaristanê Girdî do xebatanê xo dewam bikera ke komelî de hişyarîya afetan vila bibo, gede û perwerdekarî vera afetan hîna amade bibê û şaristanêko hîna biemnîyet peyda bibo.

Çarnayox: Mehmet Olmez